ބ. އޭދަފުށީގައި ހިނގި ނުރައްކާތެރި އެކްސިޑެންޓެއްގައި އަނިޔާވި އުމުރުން ދުވަސްވީ މީހާއަށް ހޮސްޕިޓަލުގައި ފަރުވާދެމުން އަންނަނިކޮށް ނިޔާވެއްޖެއެވެ.
މި މަހުގެ 15 ވަނަ ދުވަހު ހިނގި މި އެކްސިޑެންޓްގައި އަނިޔާވީ ބ. އޭދަފުށީ، 83 އަހަރުގެ އަބްބޫކަރު ޢަބްދުﷲ އަށެވެ. އޭނާ ނިޔާވީ އިންދިރާ ގާންދީ މެމޯރިއަލް ހޮސްޕިޓަލުގެ އައިސީޔޫގައި ފަރުވާދެމުން އަންނަނިކޮށް މިއަދު ހެނދުނުގެ ވަގުތެއްގައެވެ.
މި އެކްސިޑެންޓް ހިނގީ މަޣްރިބު ނަމާދަށް ފަހު، އަސާގަނޑެއްގެ އެހީގައި މަގުމަތީ ހިނގާފައި ދަނިކޮށް ދުއްވާފައި ދިޔަ ޕިކަޕެއް އަބޫބަކުރު ގައިގައި ޖެހިގެންނެވެ. ޕިކަޕްގައި ޖެހި އޭނާއަށް ސީރިއަސް އަނިޔާތަކެއް ވަނީ ލިބިފައެވެ. އަބޫބަކުރަށް އެންމެ ފުރުތަމަ ފަރުވާ ދިނީ ބ. އަތޮޅު ހޮސްޕިޓަލްގައި ނަމަވެސް، ޙާލު ދެރަވާން ފެށުމުން އިތުރު ފަރުވާއަށް މާލެ ގެނެސް އައިޖީއެމްއެޗްގައި ފަރުވާދޭން ފެށީއެވެ.
މި އެކްސިޑެންޓް ހިނގުމާ ގުޅިގެން ޕިކަޕް ދުއްވަން ހުރި ޢަބްދުﷲ ރަމީޒު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. ފުލުހުން ގެންދަނީ މި މައްސަލަ ތަހުގީގު ކުރަމުންނެވެ.
އަބޫބަކުރުގެ ޖަނާޒާގެ ކަންކަން އޮންނާނީ މިއަދު ޢަޞްރު ނަމާދަށް ފަހު އާ ސަހަރާގަ އެވެ.
