ޢިލްމު އުނގެނުމުގެ މަގަކީ ދިގު މަގެއް ކަމަށާއި، އެހެންނަމަވެސް އެއީ ސުވަރުގެއަށް މަގު ފަހިކޮށްދޭ މަތިވެރި ޖިހާދެއް ކަމަށް މިއަދުގެ ހުކުރު ޚުޠުބާގައި ބުނެފިއެވެ.
މިއަދުގެ ހުކުރު ޚުޠުބާގައި ދަރިވަރުންނަށާއި، މުދައްރިސުންނަށާއި، ބެލެނެވެރިންގެ އިތުރުން ތަޢުލީމީ ދާއިރާގެ ކަމާބެހޭ އިދާރާތަކުގެ ވެރިންނަށް ވަނީ އަގުހުރި ނަޞޭޙަތްތަކެއް ދެއްވައިފަ އެވެ. އެގޮތުން ދަރިވަރުންނަކީ ޤައުމާއި އުންމަތުގެ އުންމީދު ކަމަށާއި، އެހެން އެކަން އޮތްއިރު، ދަރިވަރުންނަށް އުނގަންނައިދޭ މުދައްރިސުންނަށް އިޚްތިރާމްކޮށް، ސްކޫލުގެ އުޞޫލުތަކަށް ހުރުމަތްތެރިކޮށް ހިތާ ބަޔަކަށްވުމަށް ޚުޠުބާގައި ވަނީ ނަޞޭޙަތްތެރިވެފައެވެ. ޚުޠުބާގައި ބުނީ، ބޭނުމެއް ނެތް ކަންކަމުގައި ވަގުތު ބޭކާރު ނުކޮށް، ޢިލްމު އުނގެނި، މާތްﷲ އެންގެވި ކަންކަމަށް ފުރިހަމައަށް ބޯލަނބާ ބަޔަކަށް ދަރިވަރުންވުމަކީ މުހިއްމު ކަމެއް ކަމަށެވެ.
ދަރިވަރުންނަށް ކިޔަވައިދޭ މުދައްރިސުންނަށް ޚުޠުބާގައި ދެއްވި ނަޞޭޙަތަކީ، މުދައްރިސުންނަކީ ޢިލްމާއި މަޢުރިފާގެ ނޫރުން ދަރިވަރުންގެ ހިތްތައް އަލިކޮށް ރޯޝަންކޮށްދޭ ދަންމަރުތަކެއް ކަމަށްވާއިރު، އިސްލާމްދީނުގެ އަޞްލުތަކާއި ތަރަހައިގެ ތެރޭގައި އެ ކުދިންގެ މުސްތަޤްބަލު ބިނާކުރާ ބަޔަކަށްވުމަށެވެ. އެއީ ނުހަނު ބޮޑު އަމާނާތެއްކަން ފާހަގަކުރަމުން ޚުޠުބާގައި ބުނީ، އެ އަމާނާތަށް ރައްކާތެރިވާ މުދައްރިސުންގެ ދަރަޖަ އެތަށް ގުނައެއް އުފުލިގެންދާނެ ކަމަށެވެ.
މީސްތަކުންނަށް ހެޔޮކޮށް އުނގަންނައިދޭ މީހާގެ މައްޗަށް މާތްﷲ ހެޔޮ ރަޙްމަތް ލައްވާއިރު އެ ކަލާނގެ ޚަލްޤުކުރެއްވި މަޚްލޫޤުން ވެސް އެ މީހަކަށް ހެޔޮ ދުޢާ ކުރާއިރު، މި މަތިވެރި މަސްޢޫލިއްޔަތަށް ކެތްތެރިވެ، ދަރިވަރުންނަށް ލޯތްބާއި ޢަދުލުވެރިކަމާއެކު އިރުޝާދު ދިނުމަށް ހުތުބާގައި ވަނީ ނަޞޭޙަތްތެރިވެފައެވެ. އެހެން އެކަން ކޮށްފި ނަމަ ކީރިތި ރަސޫލާ صَلَّى ٱللَّٰهُ عَلَيْهِ وَسَلَّمَ ގެ ހަދީޘްފުޅުތަކުގައިވާ ފަދަ ދަރަޖަ މަތިވެރި ބަޔަކަށް މުދައްރިސުން ވާނެ ކަމަށް ޚުޠުބާގައި ބުންޏެވެ.
މިއަދުގެ ޚުޠުބާގައި ބެލެނެވެރިންނަށް ވަނީ ވަރަށް މުހިއްމު ނަޞޭޙަތެއް ދެއްވައިފައެވެ. އެގޮތުން ދަރިން ސްކޫލަށް ފޮނުވުމުން ބެލެނެވެރިން ޒިންމާއިން ބަރީއަވީނޫން ކަމަށާއި އެހެނެއްކަމަކު ބެލެނެވެރިންގެ ޒިންމާއަކަށްވާން ޖެހޭނީ، އެ ކުދިންނަށް ބޭނުންވާ ތަކެތި ހޯދައިދޭ ފަދައިން އެ ކުދިންނަށް ހިތްވަރުދީ އިތުބާރު ހޯދައިދޭ ބަޔަކަށްވުމަށް ކަމަށް ޚުޠުބާގައި ބުންޏެވެ. މީގެ އިތުރުން އެ ކުދިންގެ ޞިއްޙަތާއި އެ ކުދިންނަށް އަންނަ ޖިސްމާނީ އަދި ނަފްސާނީ ބަދަލުތަކަށް ހޭލުންތެރިކުރުވާ އެންމެ ގާތް އެކުވެރިޔާއަށް ބެލެނެވެރިޔާވާން ޖެހޭނެ ކަމަށް ވެސް ޚުޠުބާގައި ވަނީ ބުނެފައެވެ.
އަދިހަމައެހެންމެ، އާޢިލީ ނުތަނަވަސްކަމާއި މުޖުތަމަޢުން ކުރިމަތިވާ އުނދަގޫތަކުން ދަރިން ދުރުކޮށްދީ، އެ ކުދިން ރައްކާތެރިކޮށްދޭ އައްޑަނައަކަށްވުމަށާއި، އެ ކުދިންނަށް ލިބޭ ކާމިޔާބީގައި ބައިވެރިވެ، ނާކާމިޔާބީގައި ރުޅި އިސްނުކޮށް އެ ކުދިންގެ އަތުގައި ހިފައި އާ އަޒުމަކާ އެކު ކުރިއަށްދާން ހިތްވަރުދޭ ބަޔަކަށްވުމަށް ވެސް ޙުޠުބާގައި ނަސޭހަތްތެރިވެފައިވެއެވެ.
ތައުލީމީ ސިޔާސަތުތައް ޒަމާނާ އެއްގޮތަށް މުރާޖަޢާކޮށް ހަރުދަނާކުރުމަށް ކަމާބެހޭ އިދާރާތަކުގެ ވެރިންނަށް ޚުޠުބާގައި ގޮވާލާފައިވާއިރު، ތަޢުލީމީ ދާއިރާފެ އަސާސީ ބިންގާތަކަށް ލޮޅުން ނާރާނޭހެން ކަންކަން ތަރުތީބުކުރުމަކީ ކުރިއަށް އަންނަން އޮތް ޖީލުތަކަށްޓަކައި ވެރިންގެ ކޮނޑުގައި އެޅިފައިވާ ބޮޑު މަސްޢޫލިއްޔަތެއް ކަމަށް ޚުޠުބާގައި ވަނީ ހަނދާންކޮށްދީފައެވެ. އަދި މި އަމާނާތަށް ރައްކާތެރިވާ ބަޔަކަށް ވެރިންވުމަށް ޙުޠުބާގައި ވަނީ ނަޞޭޙަތްތެރިވެފައެވެ.
