ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދާއި އެއްގޮތަށް ގިރާވަރު ހިއްކުމުގެ މަސައްކަތް ފަށައިފިއެވެ.
ގިރާވަރު ހިއްކަން ފަށާފައިވާކަން ހާމަކުރައްވަމުން ”އެކްސް“ގައި ހިއްސާކުރެއްވި ޕޯސްޓެއްގައި އެ މަނިކުފާނު ވިދާޅުވީ، ގިރާވަރު ހިއްކުމުގެ މަސައްކަތް ފަށާފައިވަނީ މިއަދު ހެނދުނުގެ ވަގުތެއްގައި ކަމަށެވެ.
Started reclamation of Giraavaru this morning: pic.twitter.com/bsud0ehsqu
— Dr Mohamed Muizzu (@MMuizzu) January 30, 2026
ގިރާވަރުން 169 ހެކްޓަރުގެ ބިމެއް ހިއްކުމަށް ހަމަޖެހިފައިވާއިރު، މީގެ ކުރިން އެ ސަރަހައްދުން 56 ހެކްޓަރުގެ ބިމެއް ވަނީ ހިއްކައިފައެވެ. އެއާއެކު ގިރާވަރުން ދެން ހިއްކަން ޖެހޭނީ މުޅިއެކު 113 ހެކްޓަރުގެ ބިމެކެވެ.
ގިރާވަރު ހިއްކުމުގެ މަސައްކަތް ކުރަމުންދަނީ ހުޅުމާލޭ ތިންވަނަ ފިޔަވަހީގެ ބިން ހިއްކުމުގެ މަސައްކަތަށް ރާއްޖެއަށް ގެނައި ޓްރެއިލިން ސަކްޝަން ހޮޕާ ޑްރެޖާ އޮރަންޖީއާ ޑްރެޖަރު ބޭނުންކޮށްގެންނެވެ. މި ޑްރެޖަރަކީ ދުނިޔޭގެ އެންމެ ބޮޑެތި ޑްރެޖަރުތަކުގެ ތެރެއިން ޑްރެޖަރަކަށްވާއިރު، މިއީ އެއްފަހަރާ 22,000 ކިއުބިކް މީޓަރުގެ ވެލި ނެގުމުގެ ގާބިލުކަން ހުރި ބޮޑު ޑްރެޖަރެއްކަން ފާހަގަކޮށްލަންޖެހެއެވެ.
ގިރާވަރު ހިއްކުމުގެ މަސައްކަތް މިއަދު ފަށާފައިވާއިރު، އެތަނުން ގޯތި ލިބުނު މީހުންގެ ގުރު ނެގުމުގެ ކަންކަން މާދަމާ ކުރިއަށް ގެންދިއުމަށް ހައުސިން މިނިސްޓްރީން ވަނީ ނިންމައިފައެވެ. ގިރާވަރުގެ އައު ލޭންޑް ޔޫސް ޕްލޭނެއް އެކުލަވާލައި އެ ސަރަހައްދުން ޖުމްލަ 4،072 ގޯތި ދޫކުރުމަށް ސަރުކާރުން ވަނީ ނިންމައިފައެވެ. އެއީ:
- 1،250 އަކަފޫޓުގެ 2،603 ގޯތި
- 1،650 އަކަފޫޓުގެ 1،214 ގޯތި
- 2،050 އަކަފޫޓޫގެ 254 ގޯތި
- 2،450 އަކަފޫޓުގެ އެންމެ ގޯއްޗެއް
ގިރާވަރު ހިއްކުމުގެ މަސައްކަތް މިއަދު ފަށާފައިވާއިރު، ހުޅުމާލޭ ތިންވަނަ ފިޔަވަހީގެ ބިންހިއްކުމުގެ މަސައްކަތް މިހާރު ވަނީ އެއްކޮށް ނިންމާލައިފައެވެ. މީގެ އިތުރުން ރަސްމާލޭ ބިންހިއްކުމުގެ މަސައްކަތް ހަލުވި ދުވެލީގައި ކުރިއަށްދާއިރު ގުޅީފަޅުން ވެސް އިތުރަށް ބިންހިއްކުމަށް ވަނީ ހަމަޖެހިފައެވެ. މި ސަރަހައްދުތަކުން 15,000 ގޯއްޗާއި 7,900 ފްލެޓް ދޫކުރުމަށް ހަމަޖެހިފައިވާއިރު ގޯއްޗާއި ފްލެޓަށް އެދި ފޯމް ހުށަހެޅުމަށް ހައުސިން މިނިސްޓްރީން މިހާރު ވެސް ވަނީ ހުޅުވާލައިފައެވެ.
