މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ މުވައްޒަފުން އިސްނަގައިގެން، މޯލްޑިވްސް ބްލަޑް ސަރވިސްއާ ގުޅިގެން ލޭ ހަދިޔާކުރުމުގެ ޚާއްޞަ ޕްރޮގްރާމެއް ކުރިއަށް ގެންދަން ނިންމައިފިއެވެ.
މޯލްޑިވްސް ބްލަޑް ސަރވިސްއާ ގުޅިގެން ކުރިއަށް ގެންދާ މި ޕްރޮގްރާމް ކުރިއަށްދާނީ 31 ޖެނުއަރީ 2026 ވަނަ ދުވަހުން ފެށިގެން އަންނަ މަހުގެ ފުރުތަމަ ދުވަހާއި ހަމައަށް ވެލާނާ އިންޓަރނޭޝަނަލް އެއަރޕޯޓުގެ، އެއަރޕޯޓް ރިކްރިއޭޝަން ސެންޓަރުގައެވެ.
ލޭ ހަދިޔާކުރުމުގެ މި ޕްރޮގްރާމަކީ ކޮންމެ އަހަރަކު ވެސް އެމްއޭސީއެލްގެ މުވައްޒަފުންނަށް ހުޅުވާލައިގެން ކުރިއަށް ގެންދާ ޕްރޮގްރާމެކެވެ. އެހެންނަމަވެސް ކުރީ އަހަރުތަކާ ޚިލާފަށް މި އަހަރު، މި ޕްރޮގްރާމް ކުރިއަށް ގެންދަނީ ވެލާނާ އިންޓަރނޭޝަނަލް އެއަރޕޯޓުގައި މަސައްކަތްކުރާ ދަޢުލަތުގެ އިދާރާތަކާއި، މުއައްސަސާތަކާއި، ކުންފުނިތަކުގެ އިތުރުން، ރިސޯރޓް މުވައްޒަފުންނަށް ވެސް ހުޅުވާލައިގެންނެވެ.
މިގޮތަށް ބަދަލުކުރުމުގެ މަޤުސަދަކީ ލޭ ލިބުން ދަތިވެ, ބްލަޑް ސަރވިސް އިން އާންމުންގެ އެހީތެރި ކަމަށް އެދިފައިވާތީއާއި، ކޮންމެ އަހަރެއްގެ ރޯދަ މަހު ލޭ ލިބުން ދަތިވާތީ އެކަމަށް އެހީތެރިވުމުގެ ގޮތުން ކަމަށް އެމްއޭސީއެލް އިން ވަނީ ބުނެފަ އެވެ.
އެމްއޭސީއެލް އިން އަންނަނީ މުޖުތަމައަށް ފައިދާ ހުރި މިފަދަ ތަފާތު އިޖުތިމާޢީ ހަރަކާތްތައް މެދުނުކެނޑި ހިންގަމުންނެވެ.
