މުޅިން އަލަށް ވަޒީފާގެ މާޙައުލަށް ނުކުންނަ ޒުވާނުންނަށް އަމާޒުކޮށްގެން މިނިސްޓްރީ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސް އިން އިންތިޒާމްކުރާ ”ސްކިލްއަޕް ޔޫތު“ ވޯކްޝޮޕް އަންނަ މަހުގެ 7 ވަނަ ދުވަހު ބޭއްވުމަށް ނިންމައިފިއެވެ.
ކުރިން ”ތައްޔާރުވަމާ“ ގެ ނަމުގައި ހިންގުނު މި ޕްރޮގްރާމަކީ ޒުވާނުން ވަޒީފާގެ މައިދާނަށް ތައްޔާރުކުރުމަށާއި، ވަޒީފާގެ މާޙައުލަށް ބޭނުންވާ މުހިންމު ހުނަރުތައް އުނގަންނައިދިނުމަށް ހިންގާ ޚާއްޞަ ވޯކްޝޮޕެކެވެ. މި ޕްރޮގްރާމް އަމާޒުކޮށްފައިވަނީ އުމުރުން 16 އަހަރާއި 35 އަހަރާ ދެމެދުގެ ޒުވާނުންނަށެވެ.
އެއް ދުވަހުގެ މުއްދަތަށް ކުރިއަށްގެންދާ މި ވޯކްޝޮޕް ބޭއްވުމަށް ހަމަޖެހިފައިވަނީ އަންނަ މަހުގެ 7 ވާ ބުރާސްފަތި ދުވަހު، ސޯޝަލް ސެންޓަރުގައި ހުންނަ ޔޫތު ހަބުގައެވެ. ވޯކްޝޮޕް ކުރިއަށްދާނީ އެދުވަހުގެ ހެނދުނު 08:30 އިން ހަވީރު 17:30 އަށެވެ.
މި ވޯކްޝޮޕްގައި ބައިވެރިވުމަށް ޝައުގުވެރިވާ ފަރާތްތަކަށް އެ ފުރުޞަތު މިހާރު ވަނީ ހުޅުވާލާފައެވެ. ބައިވެރިވާން ބޭނުންވާ ޒުވާނުން އަންނަ މަހުގެ 4 ވަނަ ދުވަހުގެ މެންދުރުފަހު 14:00 ގެ ކުރިން ޔޫތު މިނިސްޓްރީން ޢާންމުކޮށްފައިވާ ކިޔު.އާރު (QR) ކޯޑު މެދުވެރިކޮށް ރަޖިސްޓްރީ ކުރަންޖެހޭނެއެވެ.
ރައީސް ޑރ. މުޢިއްޒުގެ ސަރުކާރުން ޒުވާނުން ބާރުވެރިކުރުވުމަށް ކުރައްވަމުންދާ މަސައްކަތްތަކުގެ ދަށުން ކުރިއަށްގެންދާ މިފަދަ ޕްރޮގްރާމްތަކުގެ ސަބަބުން، ވަޒީފާގެ ބާޒާރަށް ނުކުންނަ ޒުވާނުންނަށް ބޭނުންވާ އިތުބާރާއި ހުނަރު ލިބިގެންދާނެ ކަމަށް އެ މިނިސްޓްރީން އުންމީދު ކުރެއެވެ.
