ކީރިތި ޤުރުއާން ހިތުދަސްކޮށް، ޙާފިޡްކަމުގެ ސަނަދު އަލަށް ހާސިލްކުރި އުމުރުން 15 އަހަރުގެ އަލްޙާފިޡް އަމަތުއްރަޙްމާން ބިންތި ޢަބްދުﷲއާ، އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު މިއަދު ބައްދަލުކުރައްވައިފިއެވެ.
މި ބައްދަލުކުރެއްވުން އޮތީ މިއަދު އިސްލާމީ ކަންތައްތަކާ ބެހޭ ވުޒާރާގައެވެ. މި ބައްދަލުކުރެއްވުމުގައި ވަޒީރު ޑރ. ޝަހީމް ވަނީ އުމުރުން އެންމެ 15 އަހަރުގައި އަމަތުއްރަޙްމާން ހޯދި މި މަތިވެރި ކާމިޔާބީ ފާހަގަކުރައްވައި، އޭނާއަށް ވަރަށް ހޫނު މަރުޙަބާއެއް ދަންނަވާފައެވެ. އަދި ޤުރުއާނުގެ ރޮނގުން އިތުރަށް ކުރިއަށް ދިއުމަށް ނަސޭޙަތްތެރިވެލައްވައި، އަމަތުއްރަޙްމާނަށް ވަޒީރު ވަނީ ހިއްވަރު ދެއްވާފައެވެ.
އަލްޙާފިޡް އަމަތުއްރަޙްމާން ބިންތި ޢަބްދުﷲ ޙާފިޡް ކަމުގެ ސަނަދު ހާސިލްކޮށްފައިވަނީ 25 ޖަނަވަރީ 2026 ގައެވެ. އޭނާ މި ޝަރަފުވެރި ސަނަދު ހާސިލްކުރީ ކީރިތި ޤުރުއާނާ ބެހޭ މަރުކަޒުގެ ޙިފްޡު ކޮމިޓީއަށް އެންމެ މަސްދުވަހުގެ ތެރޭގައި މުޅި ޤުރުއާން ކިޔުއްވައި، އެއްވަނަ ދަރަޖައިގައި ފާސްވެގެންކަން ފާހަގަކޮށްލެވެއެވެ.
މިފަދަ ޒުވާން ޙާފިޡުން އުފެދުމަކީ އިސްލާމީ މުޖުތަމައުއަކަށް ލިބޭ ބޮޑު ފަޚުރެއްކަމާއި، ސަރުކާރުން މިފަދަ ކަންކަމަށް އަބަދުވެސް ހިއްވަރުދޭނެކަމުގެ ޔަގީންކަން މި ބައްދަލުކުރެއްވުމުގައި ވަޒީރު ވަނީ ދެއްވާފައެވެ.
