އިތުރު އަތޮޅެއްގައި އާރްޓީއެލް ފެރީގެ ޚިދުމަތް ފެބްރުއަރީ މަހު ފެށުމަށް ތައްޔާރުވަމުން އަންނަ ކަމަށް ޓްރާންސްޕޯޓް މިނިސްޓްރީން ހާމަކޮށްފިއެވެ.
އެ މިނިސްޓްރީން ބުނީ، ދެން އެންމެ އަވަހަށް މި ޚިދުމަތް ފަށާނެ އަތޮޅުތައް ކަނޑައެޅުމުގެ މަސައްކަތް މިހާރު ކުރަމުން އަންނަ ކަމަށެވެ.
އާރްޓީއެލް ފެރީގެ ޚިދުމަތަކީ ޖުމްލަ ހަ ޒޯނަކަށް ބަހާލައިގެން ދެމުން އަންނަ ޚިދުމަތެކެވެ. މި ޚިދުމަތް މިހާތަނަށް ރާއްޖޭގެ ހަތަރު ޒޯނެއްގައި ފަށާފައިވާއިރު، ޚިދުމަތް ނުފަށާ މިހާރު އޮތީ، ޒޯން ހަތަރެއް އަދި ޒޯން ތިނެއްގައެވެ. ޒޯން ހަތަރެއްގައި ހިމެނޭ އަތޮޅުތަކަކީ، މ، ފ، ދ އަދި ލ. އަތޮޅެވެ. ޒޯން ތިނެއްގައި ހިމެނޭ އަތޮޅުތަކަކީ، ކ، އއ، އދ އަދި ވ. އަތޮޅެވެ.
އެންމެ ފަހުން އާރްޓީއެލް ފެރީގެ ޚިދުމަތް ފެށީ، ތ. އަތޮޅުގައެވެ. ތ. އަތޮޅުގައި މި ޚިދުމަތް ފެށުމާއެކު ޖުމްލަ 12 އަތޮޅެއްގައި މި ޚިދުމަތް މިހާރު މި ވަނީ ފެށިގެން ގޮސްފައެވެ. މި އަހަރުގެ މާޗު މަހުގެ ނިޔަލަށް ހުރިހާ އަތޮޅެއްގައި އާރުޓީއެލް ފެރީގެ ޚިދުމަތް ފެއްޓެވުމަށް ސަރުކާރުން މަސައްކަތް ކުރައްވަމުން ގެންދަވާ ކަމަށް މީގެ ކުރިން ރައީސް ޑރ. މުޢިއްޒު ވެސް ވަނީ ވިދާޅުވެފައެވެ.
އާރުޓީއެލް ފެރީގެ ޚިދުމަތަކީ، ހައި ސްޕީޑް ފެރީ ނިޒާމުން މުޅިރާއްޖެ ގުޅާލުމަށް ސަރުކާރުން ފައްޓަވާފައިވާ މަސައްކަތެކެވެ. މި ޚިދުމަތުގެ ސަބަބުން އާންމު ރައްޔިތުންނަށް ބޮޑެތި ލުއި ފަސޭހަތަކެއް ލިބިގެންދާނެއެވެ. އާރްޓީއެލް ފެރީގެ ޚިދުމަތްދެނީ، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ ލިމިޓެޑް، އެމްޓީސީސީއާ ހަވާލުކޮށްގެންނެވެ.
