މި އަހަރުގެ އޯލެވެލް އަދި އެސްއެސްސީ އިމްތިޙާނު 8،000 އަށްވުރެ ގިނަ ދަރިވަރުންނާއެކު މިއަދު ފަށައިފިއެވެ. އިމްތިޙާނުގެ ފުރަތަމަ މާއްދާއެއްގެ ގޮތުން މިއަދު ކުރިއަށްދިޔައީ ދިވެހި މާއްދާގެ އިމްތިޙާނެވެ.
މި އަހަރުގެ އައިޖީސީއެސްއީ އޯލެވެލް އަދި އެސްއެސްސީ އިމްތިޙާނުގައި ޖުމްލަ 8،218 ދަރިވަރުން ބައިވެރިވެއެވެ. މި އިމްތިޙާނުތައް ރާއްޖޭގެ 267 ސެންޓަރެއްގައި ކުރިއަށްދާއިރު، މީގެ ތެރޭގައި މާލޭގެ 21 ސެންޓަރަކާއި އަތޮޅުތެރޭގެ 246 ސެންޓަރެއް ހިމެނެއެވެ. އިމްތިޙާނުތައް ކުރިއަށްދާނީ އަންނަ މާޗު މަހުގެ ހަވަނަ ދުވަހުގެ ނިޔަލަށެވެ.
ފާހަގަކޮށްލެވޭ ގޮތުގައި އޯލެވެލް އިމްތިޙާނުގައި ބައިވެރިވުމުގެ އުޞޫލަށް ސަރުކާރުން ވަނީ މުހިންމު ބަދަލުތަކެއް ގެންނަވައިފައެވެ. އައު އުޞޫލުގެ ދަށުން، މަޖުބޫރު ހަތަރު މާއްދާ ކަމަށްވާ އިސްލާމް، ދިވެހި، އިނގިރޭސި އަދި ހިސާބު މާއްދާގެ އިމްތިޙާނު ފީ ސަރުކާރުން ދައްކައިދޭ ގޮތަށް ވަނީ ހަމަޖައްސަވައިފައެވެ.
މީގެ އިތުރުން، މޮކް އިމްތިޙާނުން ފާސްނުވާ ދަރިވަރުންނަށް ވެސް މަޖުބޫރު މާއްދާތަކުގެ އިމްތިޙާނުގައި ބައިވެރިވުމުގެ ފުރުޞަތު މިހާރު ވަނީ ފަހިކޮށްދީފައެވެ. ކުރިން އޮތް އުޞޫލަކީ މޮކް އިމްތިޙާނުން ފާސްނުވާނަމަ އަމިއްލަ ޚަރަދުގައި އިމްތިޙާނުގައި ބައިވެރިވާން ޖެހުމެވެ. ނަމަވެސް، މިހާރު އެފަދަ ދަރިވަރުންގެ ފީވެސް ދައްކައިދޭނީ ސަރުކާރުންނެވެ. އައު އިޞްލާޙުގެ ދަށުން، މަޖުބޫރު ހަތަރު މާއްދާ ހިމެނޭހެން ޖުމްލަ ފަސް މާއްދާގައި ކޮންމެ ދަރިވަރަކުވެސް ބައިވެރިވާން ޖެހެއެވެ.
ސަރުކާރުން ގެނައި މިބަދަލަކީ ވީހާވެސް ގިނަ ދަރިވަރުންނަށް އިމްތިހާނުގައި ބައިވެރިވުމުގެ މަގު ފަހިކޮށްދީ، ދަރިވަރުން ރަނގަޅު ނަތީޖާ ހޯދުމަށް ބާރު އެޅުމަށް ގެނައި ބަދަލެކެވެ.
