ބޭންކް އޮފް މޯލްޑިވްސް، ބީއެމްއެލުން ދޫކޮށްފައިވާ ކްރެޑިޓް ކާޑުތަކުގެ ލިމިޓް އިތުރުކުރުމަށް އެ ބޭންކުން ނިންމައިފިއެވެ.
ބީއެމްއެލުން އެކްސްގައި ހިއްސާކުރި ޕޯސްޓެއްގައި ބުނީ، އެ ބޭންކުގެ ކްރެޑިޓް ކާޑުން ކޮންމެ ކަސްޓަމަރަކަށް ރާއްޖެއިން ބޭރުގެ މުއާމަލާތްތައް ކުރުމަށް ކޮންމެ މަހަކަށް ކަނޑައަޅާފައިވާ ލިމިޓް ފެބްރުއަރީ މަހުން ފެށިގެން ބޮޑުކުރުމަށް ނިންމާފައިވާ ކަމަށެވެ.
އެ ބޭންކުން ބުނީ، މިއީ ކޮންމެ ކަސްޓަމަރަކަށް ވެސް ޑެބިޓް ކާޑުން ބޭނުންކުރެވޭ ގޮތަށް ހަމަޖައްސާފައިވާ ލިމިޓްގެ އިތުރުން، އެ ކަސްޓަމަރެއްގެ ކްރެޑިޓް ކާޑަށް ހަމަޖައްސާފައިވާ ލިމިޓެއް ކަމަށެވެ. ބީއެމްއެލްގެ މި ނިންމުމާއެކު ރާއްޖެއިން ބޭރުގެ ގައުމުތަކުގައި ކާޑުގެ މުއާމަލާތްތައް ކުރުމުގައި ކަސްޓަމަރުންނަށް މިހާރަށްވުރެ ބޮޑެތި ލުއި ފަސޭހަތަކެއް ލިބިގެންދާނެއެވެ.
ބީއެމްއެލް ކްރެޑިޓް ކާޑުތަކުގެ ލިމިޓަށް އައި ބަދަލުތައް:
ކްލެސިކް ކްރެޑިޓް ކާޑު: 1،400 ޑޮލަރަށް
ގޯލްޑް ކްރެޑިޓް ކާޑު: 1،500 ޑޮލަރަށް
ޕްލެޓިނަމް ކްރެޑިޓް ކާޑު: 3،000 ޑޮލަރަށް
މިދިޔަ ނޮވެމްބަރު 11 ވަނަ ދުވަހު އެ ބޭންކުން ވަނީ ޑެބިޓް ކާޑުން ރާއްޖެއިން ބޭރުގައި ފައިސާ ދެއްކުމަށް ކަނޑައަޅާފައިވާ ލިމިޓް ވެސް 1،000 ޑޮލަރަށް ބޮޑުކޮށްފައެވެ.
ކާޑު ލިމިޓްތައް ބޮޑު ކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދެކެވެ.
