ބީއެމްއެލް އެފޯޑަބަލް ހޯމް ލީސިންގ ކުންފުނިން ހިންގާ އެފޯޑަބަލް ހައުސިންގެ 5 މަޝްރޫއެއްގެ އަމަލީ މަސައްކަތް ފަށައިފިއެވެ.
ހުޅުމާލޭގައި ބޭއްވި ޚާއްސަ ރަމިއްޔާތެއްގައި މި މަސައްކަތްތައް ފައްޓަވައިދެއްވީ ހައުސިން މިނިސްޓަރ ޑރ. ޢަބްދުﷲ މުއްޠަލިބާއި ބީއެމްއެލްގެ ޗެއާޕަރސަން އަޙްމަދު ޢަލީ ޙަބީބާއި ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރު މުޙައްމަދު ޝަރީފެވެ.
ބީއެމްއެލްގެ އެފޯޑަބަލް ހައުސިންއަކީ މަރުކަޒީ ބޭންކް، އެމްއެމްއޭއިން އެކުލަވާލާފައިވާ އިންކްލޫސިވް ނޭޝަނަލް އެފޯޑަބަލް ހައުސިންގެ ދަށުން ކަނޑައަޅާފައިވާ މަޤުޞަދު ހާސިލްކުރުމަށް އުފެއްދި ބީއެމްއެލް ސަބްސިޑަރީ ކުންފުނި، އެފޯޑަބަލް ހޯމް ލީސިންގއިން ކުރިއަށްގެންދާ މަޝްރޫއެކެވެ.
މި މަޝްރޫޢުތަކާ ގުޅޭގޮތުން ވާހަކަ ދައްކަވަމުން މިނިސްޓަރ މުޢްޠަލިބު ވިދާޅުވީ، ސަރުކާރުގެ ބޯހިޔާވަހިކަމުގެ ސިޔާސަތު ކާމިޔާބު ކުރުމަށް ބީއެމްއެލުން ކުރަމުން އަންނަ މަސައްކަތަކީ ނަމޫނާ މަސައްކަތެއް ކަމަށެވެ. އެ ބޭންކުން މާލެ ސަރަޙައްދުގައި 3،260 ހައުސިންގ ޔުނިޓުގެ މަސައްކަތް ކުރާއިރު، މި މަޝްރޫއު ވެގެންދާނީ ސަރުކާރެއްގެ 5 އަހަރުގެ ދައުރުގެ ތެރޭގައި މަޝްރޫޢު ފަށައި، އެ މަޝްރޫއުގެ ހުރިހާ މަސައްކަތެއް ނިންމައި، އޭގެ ވެރިފަރާތްތަކާ ޙަވާލުކުރެވޭނެ ފުރަތަމަ ހައުންސިންގ މަޝްރޫޢަށް ކަމަށްވެސް މިނިސްޓަރ ވިދާޅުވިއެވެ.
”މިއީ ރައީސްގެ ދުރުވިސްނުމުގެ ސިޔާސަތުގެ ދަށުން ދިވެހިރާއްޖެ އިޤްތިސާދީގޮތުން އޮތް ދަތިހާލުގެ ތެރެއިންވެސް ކްރިއޭޓިވް އިނޮވޭޓިވް ސޮލިއުޝަންތަކެއް ހޯދައިގެން ރައްޔިތުންނަށް ބޯހިޔާވަހިކަން ފޯރުކޮށްދެއްވުމަށް ކުރައްވާ މަސައްކަތުގައި އެޅިގެންދާ މުހިންމު ފިޔަވަޅެއް. ބީއެމްއެލުން އިސްނަގައިގެން ސަރުކާރުގެ މި ސިޔާސަތު ކާމިޔާބު ސިޔާސަތަކަށް ހެދުމަށްޓަކައި މި ކުރަމުންދާ މަސައްކަތްތަކަކީ ޙަޤީޤަތުގައި ދިވެހިރާއްޖޭގައި ރައްޔިތުންނަށް އެކަމެއްގައި އެންމެ ފައިދާހުރި ކަންކަން ކުރުމުގައި އިސްނެގުމުގެ ނަމޫނާއެއް“ މިނިސްޓަރ މުޢްޠަލިބު ވިދާޅުވިއެވެ.
މަޝްރޫޢުއާއި ބެހޭގޮތުން ބީއެމްއެލްގެ ސީއީއޯ މުޙައްމަދު ޝަރީފް ވިދާޅުވީ މި މަޝްރޫއުތައް ހިންގާނީ އެމްއެމްއޭގެ އިންކްލޫސިވް ނެޝަނަލް އެފޯޑަބަލް ހައުސިންގ ސްކީމްގެ ދަށުން ގާއިމުކޮށްފައިވާ ގަވަރނަންސް އަދި ރިސްކް ސްޓޭންޑަޑްތަކާ އެއްގޮތަށް ގެންދިޔަ އިވެލުއޭޝަން މަރުހަލާ ފުރިހަމަކުރުމަށްފަހު ހޮވި ރާއްޖެއާއި ރާއްޖޭން ބޭރުގެ ކުންފުނިތަކާ ހަވާލުކޮށްގެން ކަމަށެވެ. އެގޮތުން މި މަސައްކަތް ހަވާލުކޮށްފައިވާ ރާއްޖޭގެ ކުންފުނިތަކަކީ އަމީން ކޮންސްޓްރަކްޝަން ޕްރައިވެޓް ލިމިޓެޑާއި އެފްޑަބްލިއު ކޮންސްޓްރަކްޝަން ޕްރައިވެޓް ލިމިޓެޑް އަދި ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑާ ކަމަށް ވިދާޅުވިއެވެ. މި މަސައްކަތް ކުރަމުންދާ ރާއްޖޭން ބޭރުގެ ކުންފުނިތަކަކީ ބެއިޖިން އަރބަން ކޮންސްޓްރަކްޝަން ގްރޫޕް އަދި ޗައިނާ މެޝިނަރީ އިންޖީނިއަރިންގ ކޯޕަރޭޝަނެވެ.ޝަރީފް ވިދާޅުވީ ނޭޝަނަލް ހައުސިން އެފޯޑެބިލިޓީ އެންޑް އެކްސެސިބިލިޓީގެ ނަމުގައި ސަރުކާރުން އެކުލަވައިލި ސިޔާސަތުގެ ސަބަބުން ރާއްޖޭގެ ކޮންސްޓްރަކްޝަނާއި ހައުސިންގ ސެކްޓާއަށް އެހީވުމަށް އިތުރު މަގެއް ފަހިވެގެންދިޔަ ކަމަށެވެ.
”ބޭންކުން މީގެ ކުރިންވެސް ވަނީ މިދާއިރާއަށް ވަރަށް ބޮޑު އިސްކަމެއް ދީފައި. ބޭންކުން ކޮންސްޓްރަކްޝަނާއި ހައުސިން ސެކްޓަރަށް ދޫކޮށްފައިވާ ލޯނުގެ އައުޓްސްޓޭންޑިން މިދިޔަ އަހަރުގެ ނިޔަލަށް 5.4 ބިލިޔަން ރުފިޔާއަށް އަރާފައިވޭ. ވޭތުވެދިޔަ އަހަރު އެކަނިވެސް 2.1 ބިލިޔަން ރުފިޔާވަނީ މި ސެކްޓަރަށް ދޫކޮށްފައި. މުޅިންވެސް ދިވެހި ކުންފުނިތަކާއި ދިވެހި ފަރުދުންނަށް“ ބީއެމްއެލްގެ ސީއީއޯ ވިދާޅުވިއެވެ.
މި މަޝްރޫއުތައް ނިމުމުން ހުޅުމާލޭ ފޭސް 1، ފޭސް 3 އަދި ވިލިމާލޭގައި 3،200 އަށްވުރެ ގިނަ ހައުސިންގ ޔުނިޓް ކުލި ދައްކައި ޚަލާސްކުރުމުން މިލްކުވާ ގޮތަށް، ނިސްބަތުން ކުޑަ ކުއްޔެއްގައި ދޫކުރެވޭނެ ކަމަށް ބީއެމްއެލުން ބުނެއެވެ. އަދި މިއީ ރާއްޖޭގައި ގެދޮރު ހޯދުމުގައި އޮތް ޑިމާންޑަށް އެކަށީގެންވާ ލުޔެއް ގެނެސްދޭނެ މަޝްރޫއުތަކެއް ކަމަށްވެސް އެ ކުންފުނިން ވަނީ ބުނެފައެވެ.
