ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ހުޅުމާލޭ ދެވަނަ ފިޔަވަހީގައި ތަރައްޤީކުރެއްވި ޝަހީދު ޢަލީ ސްކޫލަކީ، ނިމިދިޔަ އެމްޑީޕީ ސަރުކާރުގައި ފެށި މަޝްރޫއެއްގެ ގޮތުގައި ދައްކަން އެ ޕާޓީގެ އެކްޓިވިސްޓުން ނުކުމެއްޖެއެވެ.
ޝަހީދު ޢަލީ ސްކޫލަކީ އެމްޑީޕީ ސަރުކާރުން ފެށި މަޝްރޫއެއްގެ ގޮތުގައި އެ ޕާޓީގެ އެކްޓިވިސްޓުން ދައްކަން އުޅުނު ނަމަވެސް، ހަޤީޤަތުގައި މި ސްކޫލަކީ ރައީސް ޑރ. މުޢިއްޒު 2023 ވަނަ އަހަރު ވެރިކަމާ ހަވާލުވެވަޑައިގަތް ފަހުން، މަހެއްހައި ދުވަހުގެ ތެރޭގައި ބިންގާއަޅުއްވައި ދެއްވައި މަސައްކަތް ފައްޓަވައިދެއްވި ސްކޫލެކެވެ. މި ސްކޫލްގެ ބިންގާ ރައީސް އަޅުއްވައިދެއްވީ 2023 ވަނަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ.
އެމްޑީޕީގެ އެކްޓިވިސްޓުންނަކީ އަބަދު ވެސް އެހެން ސަރުކާރުތަކުން ކޮށްފައިވާ މަސައްކަތްތަކުގެ ކްރެޑިޓް ނަގަން މަސައްކަތް ކުރާ ބައެކެވެ. އެގޮތުން ކުރީގެ ރައީސް އަބްދުﷲ ޔާމީންގެ ސަރުކާރުން ފެއްޓެވި ވެލާނާ އިންޓަރނޭޝަނަލް އެއަރޕޯޓްގެ އައު ޓާމިނަލުގެ މަސައްކަތް ވެސް ހިމެނެއެވެ.
އެމްޑީޕީގެ އެކްޓީވިސްޓުން މި ފަހަރު ކްރެޑިޓް ނަގަން މަސައްކަތްކޮށްފައި މިވަނީ ޝަހީދު ޢަލީ ސްކޫލުގެއެވެ. އެބައިމީހުން ބުނާ ގޮތުގައި މި ސްކޫލަކީ ކުރީގެ ރައީސް އިބްރާހިމް މުޙައްމަދު ޞާލިޙުގެ ސަރުކާރުން ފެށި މަސައްކަތެކެވެ. އެހެންކަމުން އެ މަސައްކަތުގެ ކްރެޑިޓް ޙައްޤުވާ ފަރާތަކީ ރައީސް ޞާލިޙާއި އެމްޑީޕީ ކަމަށް އެ މީހުން ބުނެއެވެ.
އެހެންނަމަވެސް މިކަމުގެ ހަޤީޤަތް އެނގޭ ފަރާތްތަކުން އަންނަނީ އެމްޑީޕީގެ އެކްޓިވިސްޓުންނަށް ރައްދު ދެމުންނެވެ. އެއީ އެ މަސައްކަތް ފެށި ތާރީޚާ ފެއްޓެވީ ކޮން ސަރުކާރަކުންކަން ސާފުކޮށް އެނގެން އޮއްވާ އެމްޑީޕީން ރައްޔިތުންނަށް އޮޅުވާލުމަށް މަސައްކަތް ކުރާތީއެވެ. މި މަސައްކަތް ފައްޓަވައި ގާތްގަނޑަކަށް ދެ އަހަރު ދުވަހުގެ ތެރޭގައި މަސައްކަތް އެއްކޮށް ނިންމަވާލެއްވީ ވެސް މި ސަރުކާރުން ކަމަށް ބުނެ އެމްޑީޕީގެ އެކްޓީވިސްޓުންނަށް އެފަދަ ފަރާތްތަކުން އަންނަނީ ރައްދު ދެމުންނެވެ.
ޝަހީދު ޢަލީ ސްކޫލުގައި މަލްޓިޕާޕަސް ހޯލަކާއި، ޒަމާނީ ވަޞީލަތްތަކުގެ އިތުރުން ޓާފް ދަނޑަކާއި އިންޑޯ ކުޅިވަރުތައް ކުޅޭވޭނެ އިންތިޒާމްތައް ހަމަޖައްސާފައިވެއެވެ. މި ސްކޫލަކީ 1،500 އެއްހައި ކުދިންގެ ޖާގައިގެ ސްކޫލެއް ނަމަވެސް، ދެ ދަންފަޅިއަށް ބަހާލައިގެން ކިޔަވައިދޭނަމަ 2،500 އެއްހައި ކުދިންނަށް ކިޔަވައިދެވޭނޭ ކަމަށް އެޑިއުކޭޝަން މިނިސްޓްރީން ލަފާކުރެއެވެ.
ގްރޭޑް 10 އަކާ ހަމައަށް ކިޔަވައިދޭ މި ސްކޫލުގައި 32 ކުދިންގެ ޖާގައިގެ 54 ކްލާސްރޫމު ހިމެނެއެވެ. އަދި 400 މީހުންގެ އޮޑިޓޯރިއަމަކާއި، ލައިބްރަރީއަކާއި، ކޮމްޕިއުޓަރު ލެބާއި، ތިން ސައިންސް ލެބާއި، އިންޑޯ ހޯލެއްގެ އިތުރުން ބޭރުގައި ކުޅިވަރު ކުޅޭވޭނެ އިންތިޒާމު ހަމަޖައްސާފައިވެއެވެ.
