ހުރިހާ ދަރިވަރުން ވެސް ފަތިސް ނަމާދުން ދުވަސް ފެށުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދަރިވަރުންގެ ކިބައިން އެދިވަޑައިގެންފިއެވެ.
ދަރިވަރުންގެ ކިބައިން ރައީސް މިކަމަށް އެދިވަޑައިގަތީ ޝަހީދު ޢަލީ ސްކޫލް ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ. އެ މަނިކުފާނު ވިދާޅުވީ، ޒުވާނުންގެ ހިތްތަކުގައި ޤައުމިއްޔަތުގެ ބިންވަޅު ނެގުމަށް ސަރުކާރުން ގިނަގުނަ މަސައްކަތްތަކެއް ކުރަމުން އަންނަ ކަމަށެވެ. ކޮންމެ ދަރިވަރަކު ވެސް ބަލަންވާނީ ޤައުމަށް ޚިދުމަތްކޮށްދެވޭނެ ކުއްޖަކަށްވުމަށް ކަމަށް ރައީސް ވިދާޅުވިއެވެ.
ރައީސް ވިދާޅުވީ، ހުރިހާ ކުދިން ވެސް ދިރިއުޅުމުގެ ހުރިހާ ކަމެއް ވެސް ބައްޓަންކުރަންވާނީ އިސްލާމްދީނާ އެއްގޮތްވާ ގޮތުގެ މަތިން ކަމަށާއި، އިސްލާމްދީނުގައި ކަންކަން ބަޔާންކޮށްފައިވަނީ މާތް މަޤުޞަދުތަކެއްގައި ކަމަށެވެ.
”ފަރުޟު ފަސް ނަމާދު އަދާކުރުމަށް ހުރިހާ ލޮބުވެތި ދަރިވަރުންނަށް އަޅުގަނޑު ވަރަށް ބޮޑަށް އިލްތިމާސްކުރަން. ވަގުތުން ވަގުތަށް ނަމާދު ކުރުމަށް. ފަތިސް ނަމާދަށް ގަޑިއަށް ހޭލައި، ފަތިސް ނަމާދުކޮށްގެން ދުވަސް ފެށުމަށް ހުރިހާ ކުދިންވެސް ޢަޒުމު ކަނޑައަޅަން އަޅުގަނޑު އިލްތިމާސްކުރަން. މައިންބަފައިންގެ ކިބައިން ވެސް އެދެން ހުރިހާ ކިޔަވާ ކުދިން ދުވަސް ފަށަނީ ގަޑިއަށް ފަތިސް ނަމާދުގެ ގަޑީގައި ތެދުވެ ނަމާދު ކޮށްގެންކަން، އެއީ މައިންބަފައިންގެ ޒިންމާއެއް ކަމަށް ކަނޑައަޅައި އެކަން ކަށަވަރުކުރެއްވުމަށް،“ — ރައީސް ވިދާޅުވި އެވެ.
ހުރިހާ ދަރިވަރުން ވެސް ޓީޗަރުންނާއި، މައިންބަފައިންގެ ނަސޭހަތް އަޑުއަހައި އެ މީހުންގެ އިރުޝާދުތަކާ އެއްގޮތަކަށް ހުރިހާ ދަރިވަރުން ވެސް ޢަމަލުކުރަންޖެހޭނެ ކަން ފާހަގަކުރައްވަމުން ރައީސް ވިދާޅުވީ، އެގޮތަށް އެކަން ނުކޮށްފިނަމަ ކުރިއަރައިދިޔުމުގައި ބޮޑެތި ދަތިތަކެއް ކުރިމަތިވެދާނެ ކަމަށެވެ.
މި އަހަރުގެ ކިޔެވުން މިއަދު ފަށާފައިވާއިރު، މިއީ 2020 ވަނަ އަހަރަށް ފަހު ޖެނުއަރީ މަހު ކިޔެވުން ފެށި ފުރުތަމަ އަހަރެވެ. މި އަހަރުގެ ކިޔެވުން ފަށާފައި މިވަނީ ސަރުކާރުގެ 219 ސްކޫލެއްގައި 80،715 ދަރިވަރުންނާއެކުގަ އެވެ. މީގެ އިތުރުން ދަރިވަރުންނަށް ކިޔަވައިދޭން 9،952 ޓީޗަރުން އެ ސްކޫލްތަކުގައި ހަރަކާތްތެރިވާނެ ކަމަށް އެޑިއުކޭޝަން މިނިސްޓްރީގެ ތަފާސްހިސާބުން ދައްކަ އެވެ.
