ޤައުމީ ފުޓްސަލް ޓީމުން ހޯދި ތާރީޚީ ކާމިޔާބީ ފާހަގަކުރުމުގެ ގޮތުން މާދަމާ ރޭ މާލޭގައި ހަވާއެރުވުމަށް ނިންމައިފިއެވެ.
މިނިސްޓްރީ އޮފް ސްޕޯޓްސް، ފިޓްނެސް އެންޑް ރީކްރިއޭޝަނުން މަޢުލޫމާތު ދީފައިވާގޮތުގައި، ޤައުމީ ޓީމަށް މަރުޙަބާ ކިޔުމުގެ ގޮތުން މާދަމާ ރޭ އާޓިފިޝަލް ބީޗު ސަރަޙައްދުގައި ހަވާއެރުވުމުގެ އިތުރުން ޚާއްޞަ ޙަރަކާތްތަކެއް ކުރިޔަށް ގެންދިޔުމަށް ވަނީ ހަމަޖެހިފައެވެ.
އެގޮތުން، އެފްއޭއެމާއި އެ މިނިސްޓްރީން ގުޅިގެން ޓީމަށް މަރުޙަބާ ކިޔުމުގެ ގޮތުން ހަވާ އެރުވުމުގެ އިތުރުން ބޮޑުބެރުގެ ޙަރަކާތްތައް ވެސް ކުރިއަށް ގެންދިއުމަށް ވަނީ ހަމަޖެހިފައެވެ. އަދިހަމައެހެންމެ، ޤައުމީ ޓީމުގެ ކުޅުންތެރިންނާއެކު ފޮޓޯ ނެގުމާއި ޓްރޮފީއާއެކު ފޮޓޯ ނެގުމުގެ ފުރުޞަތު ވެސް ހަމަޖެހިފައިވެއެވެ.
ޤައުމީ ފުޓްސަލް ޓީމުން ރާއްޖެ އައުމަށް ހަމަޖެހިފައިވާ ބޯޓު ވެލާނާ އިންޓަނޭޝަނަލް އެއަރޕޯޓަށް ޖެއްސުމާއެކު އުފާ ފާޅުކުރުމައި މަރުޙަބާ ކިޔުމުގެ ހަރަކާތްތައް ވެލާނާ އިންޓަނޭޝަނަލް އެއަރޕޯޓާއި ހަމައިން ފެށޭނެއެވެ. އެގޮތުން، ވީއައިޕީން ޓީމަށް މަރުޙަބާ ދެންނެވުމާއި އެއަރޕޯޓުން ޓީމު މާލެ އައުމަށްފަހު، އަމީނީ މަގާއި މަޖީދީ މަގުން ޕިކަޕުގައި އާންމުންނަށް ފެންނަގޮތަށް ޓްރޮފީއާއެކު ޓީމުން ދަތުރުކުރާނެއެވެ.
ފާހަގަކޮށްލެވޭ ގޮތުގައި، މިއީ ސަރަހައްދީ މުބާރާތަކުން ރާއްޖޭގެ ފުޓްސަލް ޓީމު ހޯދި ފުރަތަމަ ކާމިޔާބީއެވެ. ކުޅުނު ހުރިހާ މެޗެއް ކާމިޔާބުކޮށް ރާއްޖޭގެ ޤައުމީ ޓީމުން ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕްގެ ތަށި އުލުފާލިއިރު ރާއްޖޭގެ ޤައުމީ ޓީމަށް މަރުޙަބާ ކިޔުމަށް ވިހާވެސް ގިނަ ބަޔަކު އާޓިފިޝަލް ބީޗަށް ދިއުމަށް ސަރުކާރުން އެދެއެވެ.
