މީހެއްގެ ސޯޝަލް މީޑިއާ އެކައުންޓުތައް ކޮމްޕްރޮމައިޒްކޮށް (ހެކްކޮށް)، އެ މީހާގެ ހިއްސާ އޮންނަ ކުންފުންޏެއްގެ ބޭންކު އެކައުންޓުން ގިނަ އަދަދެއްގެ ފައިސާ ނެގި މައްސަލައެއްގައި 10 މީހަކު ފުލުހުން ހައްޔަރުކޮށްފިއެވެ. މި މައްސަލައާ ގުޅިގެން ހައްޔަރުކޮށްފައިވަނީ ތަފާތު އެކި ރަށްރަށަށް ނިސްބަތްވާ މީހުންނެވެ.
އޭގެ ތެރޭގައި ހިމެނެނީ: މުޙައްމަދު ޙަސަން (59އ) – ލ. އިސްދޫ / ގުޑްލައިފް ޢަލީ ޢިރުފާނު އަޙްމަދުދީދީ (26އ) – ސ. ހިތަދޫ / އުދަ ޢަލީ ޝިރާޒު (38އ) – ސ. ހިތަދޫ / ނަންރީތިގެ ޢަބްދުﷲ ނާފިޛް (39އ) – ހދ. ވައިކަރަދޫ / ޕެރިމްރޯޒް މުޙައްމަދު ޢަލީ (42އ) – ގއ. ކަނޑުހުޅުދޫ / ފޫހިވާގެ މުޙައްމަދު ނުހާދު ޢަލީ (30އ) – މ. މާލޭގެއާގެ / މާލެ މުޙައްމަދު ސިމާދު (38އ) – ހއ. ކެލާ / ޕެނަމާ ޢަލީ އިމްރާން (38އ) – ގދ. ފިޔޯރީ / ހީނާމާގެ ޢަބްދުﷲ އިސްރާޤް (19އ) – ގދ. ތިނަދޫ / ގުލްބަކާގެ މުޙައްމަދު އިބްރާހީމް (49އ) – ކ. ހިންމަފުށި / މެޑޯޒް އެވެ.
ފުލުހުން މަޢުލޫމާތު ދީފައިވާ ގޮތުގައި މި މީހުންގެ ތެރެއިން އެކަކު ހިންމަފުށިން، ތިން މީހަކު އައްޑޫ ސިޓީން އަދި ބާކީ ތިބި މީހުން ހައްޔަރުކޮށްފައިވަނީ މާލެއިންނެވެ. މި މައްސަލައިގެ ތަޙުޤީޤުން އެނގިފައިވާ ގޮތުގައި، ހައްޔަރުކުރި މީހުންގެ ތެރެއިން ހަ މީހުންނަކީ ސްކޭމްކޮށްގެން ހޯދާފައިވާ ފައިސާ އެ މީހުންގެ އަމިއްލަ އެކައުންޓަށް ޖަމާކޮށް، އެ ފައިސާ ނަގާފައިވާ މީހުންނެވެ. މީގެ އިތުރުން، އެކަކު ވަނީ މި ފައިސާ އެކި ވިޔަފާރިތަކަށް ޖަމާކޮށްގެން މުދާ ގަނެފައެވެ. އަދި ބާކީ ތިބި ތިން މީހުންނަކީ އެކި މީހުން އޭޓީއެމްތަކަށް ގެންގޮސް، އެ މީހުން މެދުވެރިކޮށް ފައިސާ ނެގުމަށްފަހު އެ ފައިސާއާ ހަވާލުވެފައިވާ މީހުންނެވެ.
މި އޮޕަރޭޝަނަކީ ކުންފުންޏެއްގެ އެކައުންޓުން 279,600 އަށްވުރެ ގިނަ ރުފިޔާ ނަގާފައިވާ ކަމަށް ހުށަހެޅުނު މައްސަލައަކާ ގުޅިގެން، މި ޖަނަވަރީ މަހުގެ 21 ވަނަ ދުވަހުން ފެށިގެން ކުރިއަށް ގެންދިޔަ އޮޕަރޭޝަނެކެވެ. ކޯޓު އަމުރުގެ ދަށުން ހިންގި މި އޮޕަރޭޝަންގައި ގޭންގު ކްރައިމް އިންވެސްޓިގޭޝަން ޔުނިޓާއި، ހިންމަފުށި ޕޮލިސް އަދި އައްޑޫ ސިޓީ ހިތަދޫ ޕޮލިސް ވަނީ ބައިވެރިވެފައެވެ. ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، މުޙައްމަދު އިބްރާހީމަށް 5 ދުވަސް، މުޙައްމަދު ޢަލީ އަދި މުޙައްމަދު ޙަސަނަށް 7 ދުވަސް، ޢަލީ ޢިރުފާނަށް 10 ދުވަސް، އަދި ބާކީ ތިބި ހަ މީހުންނަށް 15 ދުވަހުގެ ބަންދުގެ މުއްދަތެއް ކޯޓުން ވަނީ ދީފައެވެ.
މި މައްސަލަ އިތުރަށް ތަޙުޤީޤު ކުރަމުންދަނީ ދިވެހި ފުލުހުންގެ ޚިދުމަތުގެ އެންޓި ސްކޭމް ސެންޓަރުންނެވެ.
