ދިވެހިރާއްޖެއަށް އަންނަ އާގު ބޯޓުފަހަރަށް މާދަމާއިން ފެށިގެން 24 ގަޑިއިރު ޕޯޓް ލިމިޓް އޭރިޔާއަށް ވަދެވޭގޮތަށް ހުޅުވާލަން ޓްރާންސްޕޯޓް މިނިސްޓްރީން ނިންމައިފިއެވެ.
މިކަން އިޢުލާން ކުރައްވައި ޓްރާންސްޕޯޓް މިނިސްޓަރު މުޙައްމަދު އަމީން އެކްސްގައި ހިއްސާކުރެއްވި ޕޯސްޓެއްްގައި ވިދާޅުވީ، މިއީ ފާއިތުވި 37 ވަރަކަށް އަހަރުގެ ތެރޭގައި ޢަމަލުކުރަމުން އައި އުސޫލޫ ބަދަލުކޮށް އިޤްތިޞާދީ ގޮތުން އެޅުނު މުހިންމު ފިޔަވަޅެއް ކަމަށެވެ.
”މިއީ 1988 ވަނަ އަހަރުން ފެށިގެން ޢަމަލުކުރަމުން އައި އުޞޫލު ބަދަލުކޮށް، އިޤްތިޞާދީ ގޮތުން އެޅުނު މުހިންމު ފިޔަވަޅެއް. މިބަދަލާއެކު، ކުރިން ވެސް އުޅަނދުފަހަރަށް ދެމުން އައި ކްލިއަރެންސް ދިނުމާއި ޕައިލޮޓޭޖުގެ ޚިދުމަތް ދިނުމުގެ ކަންކަންވެސް 24 ގަޑި އިރު ހިނގަމުން ދާނެ،“ — މިނިސްޓަރު އަމީން ވިދާޅުވިއެވެ.
މީގެ ކުރިން ޢަމަލުކުރަމުން އައި އުޞޫލަކީ، ރޭގަނޑު 12 ޖެހުމަށްފަހު މާލޭ ވިޔަފާރި ބަނދަރަށް އަންނަ އާގު ބޯޓުފަހަރު ހެނދުނު ހައެއް ޖަހަންދެން ބޭރުގައި މަޑުކުރުމެވެ. ނަމަވެސް، މިހާރު ރާއްޖެއަށް އަންނަ އުޅަނދުތައް ގިނަވަމުންދާތީ، ކުރިން މިކަން އޮތް ގޮތަށް ޢަމަލުނުކުރަން ސަރުކާރުން މިހާރު ވަނީ ނިންމައިފަ އެވެ.
މިނިސްޓަރު އަމީން ކުރެއްވި ޕޯސްޓުގައި އިތުރަށް ވިދާޅުވީ މި ނިންމުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ހަރުދަނާ ސިޔާސަތުތަކުގެ ދަށުން ގެނެވުނު ވަރަށް މުހިންމު ހެޔޮ ބަދަލެއް ކަމަށެވެ.
މި ބަދަލާއެކު، އުޅަނދުތަކުގެ ރައްކާތެރިކަން ކަށަވަރުކުރުމާއި، އިންޓަނޭޝަނަލް ޝިޕް އެންޑް ޕޯޓް ފެސިލިޓީ ސެކިއުރިޓީ ކޯޑުގެ މިންގަނޑުތަކާ އެއްގޮތަށް ދޭންޖެހޭ ހުއްދަތަކާއި ޕައިލޮޓޭޖްގެ ހިދުމަތްތައް މެދުނުކެނޑި ލިބޭނެއެވެ. މީގެ އިތުރުން ބޯޓުފަހަރު ދުއްވާ ފަރާތްތަކުން ބޭރުގައި މަޑުކުރަންޖެހުމުގެ ސަބަބުން ހިނގާ އިތުރު ޚަރަދުތަކުން ސަލާމަތްވާނެ ކަމަށް ވެސް އެ މިނިސްޓްރީން ޤަބޫލުކުރެއެވެ.
