ދިވެހިރާއްޖޭން ބައިނަމްއަޤްވާމީ މުބާރާތެއްގެ އެއްވަނަ ހޯދުމަކީ ތާރީޚީ ފަޚުރެއް ކަމަށް ރައީސް ޑރ. މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ފުރަތަމަ ފަހަރަށް ސާފް އިން ކުރިއަށް ގެންދިޔަ ”ސާފް ފުޓްސަލް ޗެމްޕިއަންޝިޕް 2026″ގެ ޗެމްޕިއަންކަން ރާއްޖެއިން ހޯދުމާއިގުޅިގެންނެވެ.
ރައީސްގެ ޕޯސްޓްގައި ވިދާޅުވީ ޤައުމީ ފުޓްސަލް ޓީމުގެ ކުޅުންތެރީން މި ހޯދި ބޮޑު ކާމިޔާބީގެ އުފަލުގައި މާތްﷲގެ ޙަޟްރަތަށް ޙަމްދު ކުރުން އިސްކުރައްވާކަމަށެވެ.
ހަމަ މިއާއިއެކު ކުޅިވަރުގެ މައިދާނުގައި ދިވެހި ހިތްވަރުގަދަ ދަރީން ހޯދަމުންދާ ރަންވަނަތައް އިތުރުވުމަކީ، ޤައުމުގެ މުސްތަޤްބަލަށް އުޖާލާކަމެއް ކަމުގައި ރައީސް ފާހަގަކުރެއްވިއެވެ. އަދި ވަކީން ޚާއްޞަކޮށް، ކުޅުނު ކޮންމެ މެޗަކުން ވަރަށް ފުރިހަމަ މޮޅަކާއެކު ބައިނަމްއަޤްވާމީ މިފަދަ މުބާރާތެއްގެ އެއްވަނަ ހޯދުމަކީ ތާރީޚީ ފަޚުރެއް ކަމަށާއި، މިއީ ޤައުމީ ރޫޙާއި ޢަޒުމުގައި ހިތްވަރުކޮށް ކާމިޔާބު ހޯދުމުގައި ދެވަނައެއް ނެތް ރީތި ނަމޫނާއެއް ގޮތުގައި ރައީސް ސިފަކުރެއްވިއެވެ.
ރައީސް ވަނީ ޤައުމީ ފުޓްސަލް ޓީމުގެ ހުނަރުވެރި ކުޅަދާނަ ކުޅުންތެރީންނަށް އައްސަރިބަހާއި ޝުކުރު ތަކުރާރުކުރައްވާފައެވެ.
ތައިލެންޑުގައި ކުރިއަށްދާ މި މުބާރާތުގެ ޗެމްޕިއަންކަން ރާއްޖޭން ހޯދާފައިވަނީ ކުޅުނު ފަސް ވަނަ މެޗުގައި ބޫޓާންގެ މައްޗަށް ކުރި ހޯދައިގެންނެވެ. މި މުބާރާތުގެ ޗެމްޕިއަންކަން ރާއްޖޭން ހޯދާފައިވަނީ ކުރިއަށް އެއް މެޗު އޮއްވައެވެ. ބޫޓާންގެ މައްޗަށް ރާއްޖޭން ކުރި ހޯދުމާއެކު މިހާތަނަށް ކުޅުނު ފަސް މެޗުން ހޯދި 15 ޕޮއިންޓާއެކު ރާއްޖޭން މިވަނީ މި މުބާރާތުގެ ޗެމްޕިއަންކަން ކަށަވަރުކޮށްފައެވެ.
ބެންކޮކްގެ ނޮންތަބުރީ ސްޓޭޑިއަމްގައި ކުޅުނު މި މެޗު ރާއްޖެއިން ކާމިޔާބުކޮށްފައިވަނީ 3-1ގެ ނަތީޖާ އަކުންނެވެ. މި ނަތީޖާ އާއެކު ރާއްޖެއަށް މުބާރާތުގެ ޗެމްޕިއަންކަން ކަށަވަރުވެގެން ދަނީ ކުޅުނު ފަސް މެޗުވެސް ކާމިޔާބުކޮށް ހޯދި 15 ޕޮއިންޓާއެކު އެއް މެޗު ކުރިއަށް އޮއްވައެވެ. މި މުބާރާތުގެ ފަހު މެޗުގައި ރާއްޖޭން މި މަހުގެ 26 ވަނަ ދުވަހު ނިކުންނާނީ ސްރީލަންކާ އާއި ދެކޮޅަށެވެ.
