މިއަހަރުގެ މިހާތަނަށް 158 ކިލޯއަށްވުރެ ގިނަ އަދަދެއްގެ މަސްތުވާތަކެތި އަތުލައިގެންފައިވާ ކަމަށް ދިވެހި ފުލުހުން ހާމަކޮށްފިއެވެ.
ފުލުހުންގެ ޑްރަގް އެންފޯސްމަންޓުގެ ތަފާސްހިސާބުތަކުން ދައްކާ ގޮތުގައި މިއަހަރުގެ އޮގަސްޓް މަހުގެ 31 ވަނަ ދުވަހުގެ ނިޔަލަށް 158.8 ކިލޯގެ މަސްތުވާތަކެތި ވަނީ އަތުލައިގެންފައެވެ.
މި މުއްދަތުގައި 5252 ބަނގުރާފުޅި އަތުލާފައިވާކަމަށްވެސް ތަފާސްހިސާބުތަކުން ދައްކައެވެ. އަދި އަތުލައިގެންފައިވާ މަސްތުވާތަކެއްޗާއި ބަނގުރަލުގެ އަގު 282،273،651.52 ރުފިޔާއަށް އަރާ ކަމަށެވެ.
ފުލުހުންގެ ތަފާސް ހިސާބުތައް ދައްކާގޮތުގައި ވޭތުވެދިޔަ 8 މަސް ދުވަހުގެ ތެރޭގައި އެ ފަދަ 475 މައްސަލައެއް ފުލުހުންނަށް ހުށަހަޅާފައިވެއެވެ. އަދި 230 މައްސަލައެއް ތަހުގީގުގެ މަރުހަލާ ނިންމުމަށްފަހު ޕްރޮސިކިއުޓާ ޖެނެރަލްގެ އޮފީހަށް ދައުވާ ކުރުމަށް އެދި ހުށަހަޅާފައިވާ ކަމަށް ފުލުހުން ބުނެފައިވެއެވެ.
