ރާއްޖޭގެ ދެކުނުގެ ރަށެއްގައި ނުކުޅެދުންތެރިކަން ހުންނަ ފިރިހެނަކަށް ޖިންސީ ގޯނާކުރި މީހަކު ޝަރީޢަތް ނިމެންދެން ބަންދުކުރުމަށް ކްރިމިނަލް ކޯޓުން އަމުރުކޮށްފިއެވެ.
ފުލުހުން މަޢުލޫމާތުދެއްވާ ގޮތުގައި މިދިޔަ އެޕްރީލް މަހު އެއިދާރާއަށް ހުށަހެޅުނު މިމައްސަލައިގައި ތުހުމަތުކުރެވޭ 57 އަހަރުގެ މީހާ ހައްޔަރުކޮށްފައިވަނީ ސެޕްޓެމްބަރު 11 ވަނަ ދުވަހުއެވެ.
ފުލުހުންގެ މީޑިއާ ގްރޫޕުގައި ހިއްސާކުރި މެސެޖުގައި ބުނެފައިވަނީ ކޯޓު އަމުރެއްގެ ދަށުން 57 އަހަރުގެ މީހަކު މިމައްސަލާގައި ހައްޔަރުކޮށްފައިވާކަމަށާއި އެމީހާގެ ބަންދާއިމެދު ގޮތެއް ކަނޑައެޅުމަށް ކްރިމިނަލް ކޯޓަށް ހާޒިރުކުރުމުން ޝަރީޢަތް ނިމެންދެން ބަންދުކޮށްފައިވާކަމަށެވެ.
މީގެ އިތުރުން ޖިންސީ އަނިޔާ ލިބުނު މީހާއަކީ ނުކުޅެދުންތެރިކަން ހުންނަ މީހަކަށް ވާތީ، ގާނޫނުގައިވާ ގޮތުގެ މަތިން މި މައްސަލަ ފުލުހުން ތަހުގީގުކުރަމުން ދަނީ ކުޑަކުއްޖަކަށް ޖިންސީ ގޯނާކުރި މައްސަލައެއްގެ ގޮތުގައި ކަމަށްވެސް ފުލުހުންގެ މެސެޖުގައި ބުނެފައިވެއެވެ. އަދި މިފަދަ މައްސަލަތަކުގައި އަނިޔާ ލިބިފައިވާ ފަރާތުގެ އައިޑެންޓިޓީ ހިމާޔަތްކުރުމުގެ ގޮތުން އަތޮޅާއި ރަށް ހާމަނުކުރުމަށް ފުލުހުން ޢަމަލުކުރާ އުސޫލު ފުލުހުން ވަނީ ފާހަގަކޮށްފައެވެ.
