ރާއްޖޭގެ ޑިފެންސް މިނިސްޓަރު މުހައްމަދު ގައްސާން މައުމޫން، ޗައިނާގެ ޑިފެންސް މިނިސްޓަރު އެޑްމިރަލް ޑޮންގް ޖަންއާ މިއަދު ބައްދަލުކުރައްވައިފިއެވެ.
ޑިފެންސް މިނިސްޓްރީން ”އެކްސް“ ގައި ކުރި ޕޯސްޓެއްގައި ބުނެފައިވަނީ، ޗައިނާއަށް ރަސްމީ ދަތުރެއްގައި ވަޑައިގެން އުޅުއްވާ ގައްސާނު، ޑޮންގްއާ ބައްދަލުކުރެއްވީ 11 ވަނަ ބެއިޖިން ޝަންޝަންގެ ފޯރަމްގެ ހަވާސާގައި ކަމަށެވެ.
މިނިސްޓްރީން އިތުރަށް ބުނެފައިވަނީ އެ ބައްދަލުކުރެއްވުމުގައި ދެ ގައުމުގެ އަސްކަރިއްޔާ ގުޅިގެން މަސައްކަތް ކުރެވޭނެ ގޮތާއި ގުޅޭ ގޮތުން މަޝްވަރާކޮށްފައިވާ ކަމަށެވެ. ބައްދަލުވުމާ ގުޅޭ އިތުރު ތަފްސީލެއް ނުދެއެވެ.
ބައްދަލުވުމުގައި ރާއްޖޭގެ ފަރާތުން ޑިފެންސުގެ އިސް ބޭފުޅުންގެ އިތުރުން ރާއްޖެއިން ޗައިނާއަށް ކަނޑައަޅުއްވާފައިވާ ސަފީރު ފަޒީލް ނަޖީބު ބައިވެރިވަޑައިގެންނެވިއެވެ.
ރާއްޖެ-ޗައިނާގެ ޑިފެންސުގެ ވެރިން ބައްދަލުކުރައްވާފައިވާއިރު ދިފާއީ ބާރަށް ބޭނުންވާ ނަން-ލީތަލް އާލަތްތަކާއި ސިފައިންނަށް ތަމްރީނުތައް ހޯދުމަށް ރާއްޖެއިން ވަނީ ސޮއިކޮށްފައެވެ. އެ އެއްބަސްވުމުގެ ތަފްސީލު ސަރުކާރުން ހާމަކޮށްފައެއް ނުވެއެވެ.
