މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރ އާއި އިންޓަރނޭޝަނަލް ފަންޑް ފޯ އެގްރިކަލްޗަރ ޑިވެލޮޕްމަންޓް (އީފާޑް) ގުޅިގެން ކުރިއަށްގެންދާ ”މޯލްޑިވްސް އެގްރީބިޒްނަސް ޕްރޮގްރާމް“ ގެ ދަށުން އުތުރުގެ 5 ރަށެއްގައި ގްރީންހައުސް ގާއިމްކުރުމުގެ އެއްބަސްވުމުގައި މިއަދު ސޮއިކޮށްފިއެވެ.
ގްރީން ހައުސް ގާއިމް ކުރާ ރަށްތަކަކީ
- ހދ. ކުމުންދޫ
- ހދ. ހަނިމާދޫ
- ށ. ބިލެތްފަހު
- ށ. ކަނޑިތީމު
- ށ. ފޭދޫ
އެ މަސައްކަތް ކުރިއަށް ގެންދަނީ މޯލްޑިވްސް އެގްރިބިޒްނަސް ޕްރޮގްރާމް (މެޕް) ގެ ނަމުގައި ކަަމަށެވެ. އެ ޕްރޮގްރާމަކީ އިންޓަނޭޝަނަލް ފަންޑް ފޯ އެގްރިކަލްޗަރަލް ޑިވެލޮފްމަންޓް (އިޕާޑް) އާއި ދިވެހި ސަރުކާރާއި ގުޅިގެން ކުރިއަށްދާނެ ޕްރޮގްރާމެކެވެ.
އެ ޕްރޮޖެކްޓް ކުރިއަށް ގެންދަނީ ހއ، ހދ، އަދި ށ. އަތޮޅުގެ 26 ރަށެއްގައެވެ.
އެ ރަށްތަކުގެ ދަނޑުވެރިން ހިމަނައިގެން އައިލެންޑް ޕާމާ ފޯރަމް ގްރޫޕްތަކެއް ގާއިމްކޮށް އެ ފަރާތްތަކަށް ދަނޑުވެރިކަމާއި އަދި ގުޅުންހުރި ދާއިރާތަކުން ތަމްރީނާއި މައުލޫމާތާއި މާލީ އެހީތެރިކަން ފޯރުކޮށްދިނުމުގެ މަސައްކަތް ކުރަމުންދާ ކަމަށް އެ ވުޒާރާއިން ބުނެއެވެ.
މި ޕްރޮޖެކްޓްގެ މައިގަނޑު އެންމެ މުހިންމު އެއް މަސައްކަތަކީ ކްލައިމެޓް ސްމާޓް އަދި ދެމެހެއްޓެނިވި ދަނޑުވެރިކަން ކުރިއަރުވާ ޒަމާނުއްސުރެ ދަނޑުވެރިން ކުރަމުން އަންނަ ގޮތަށްވުރެ ރަނގަ/ލު އަދި ޒަމާނީ ޓެކްނޮލޮޖީ ބޭނުންކޮށްގެން ދަނޑުވެރިކަން ކުރުމަށް ދަނޑުވެރިންގެ މެދުގައި ޝައުގުވެރިކަން އުފައްދާ އަހުލުވެރިކުރުމެވެ.
އެގޮތުން 12 ރަށެއްގައި ގްރީން ހައުސް އަޅައިގެން ކޮކޯޕީޓްގައި ކިއުކަމްބާ، މެލަން ހައްދާނެ ގޮތުގެ ޓެކްނިކަލް ތަމްރީން ޕްރޮގްރާމްތައް ވަނީ ކުރިއަށް ގެންގޮސްފައެވެ. އެ ޕްރޮގްރާމްތަކުގައި ޖުމްލަ 224 މީހުންވަނީ ތަމްރީން ކޮށްފައި ވެއެވެ. އަދި އިތުރު ބާވަތްތައް ހައްދާނެ ގޮތް ދަސްކޮށްދިނުމަށް ބޭނުންވާ ތަކެތި ގަތުމުގެ މަސައްކަތް މިހާރު ދަނީ ކުރިއަަށެވެ.
ދަނޑުވެރިކަމާ ބެހޭ ވުޒާރާ އިން ބުނީ އެ ޕްރޮޖެކްޓް އިތުރަށް ފުޅާކުރުމަށް އިތުރު ފަސް ރަށެއްގައި ގްރީން ހައުން އަޅައިގެން ތަރުކާރީ ހައްދާނެ ގޮތުގެ ތަމްރީން ޕްރޮގްރާމް ކުރިއަށް ގެންދިއުމަށްޓަކައި އެ ރަށްތަކުގައި ގްރީން ހައުސް އިންސްޓޯލްކުރުމަށް އަމިއްލަ ފަރާތަކާއި އެކުގައި މިއަދު ސޮއިކޮށްފައިވާ ކަމަށެވެ.
