ރޭސިންގ ޓްރެކެއް ތިލަފުށީގައި ތަރަޢްޤީކުރަން ނިންމައި އެކަމުގެ މަސައްކަތް ފަށާފައިވާކަމުގައި ކުޅިވަރާއި ހަށިހެޔޮކަމާއި ބެހޭ މިނިސްޓަރ އަބްދުﷲ ރާފިއު ވިދާޅުވެއްޖެއެވެ.
އިއްޔަ ރައީސްއޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރެއްވި ސުވާލަކަށް ޖަވާބުދެއްވަމުން މިނިސްޓަރ ވިދާޅުވީ ރޭސިން ޓްރެކަކާއި ޑްރިފްޓިން ޓްރެކެއް އެޅުމަށް ބޭނުންވާ ބިން ތިލަފުށިން ހޯދުމަށް ހައުސިން މިނިސްޓްރީއަށް ސިޓީއެއް ފޮނުވާފައިވާނެކަމަށެވެ.
ހުޅުމާލޭގައި ރޭސިން އާއި ޑްރިފްޓިންއަށް ދޫކުރި ބިން މިހާރު ބޭނުންކުރުން މަނާކޮށްފައިވާއިރު ސަލާމަތީގޮތުން ރައްކާތެރި ތަނަކަށް ރޭސިންގ ޓްރެކް ބަދަލުކުރުމުގެ މަސައްކަތް މިނިސްޓްރީން ކުރަމުންދާކަމަށާއި މިކަމުގައި ރޭސިން އެސޯސިއޭޝަން އާއި ޑްރިފްޓިން އެސޯސިއޭޝަން އާއެކު މަޝްވަރާކުރައްވައި އެކަމުގައި ހުރި ގޮންޖެހުންތަކާއި ކަންބޮޑުވުންތައް އޮޅުން ފިލުވާފައިވާކަމަށް މިނިސްޓަރުގެ ވާހަކަފުޅުގައި ފާހަގަކުރެއްވިއެވެ.
ހުޅުމާލޭގައި ރޭސްޖެހުމަށް ދޫކޮށްފައިވާ ސަރަހައްދުގެ ހުއްދަ ބާތިލުކުރީ މާލެ އާއި ހުޅުމާލޭގައި ދުއްވާ ރޭސިން ކާރުތަކުގެ ސަބަބުން އާންމުންގެ ފުރާނައަށް ނުރައްކާވަމުންދިއުމުގެ ސަބަބުންނެވެ.
ރޭސިންގ ޓްރެކެއް ޤާއިމުކުރެއްވުމަކީ ރައީސް ޑރ. މުޙައްމަދު މުޢިއްޒުގެ ވަޢުދުފުޅެކެވެ.
