އިއްޔެ މާލޭގައި ހިނގި އަލިފާނުގެ ހާދިސާއާ ގުޅިގެން 57 މީހަކު މަގުމަތިވިކަމަށްް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.
އިއްޔެ ހަވީރު އަލިފާން ރޯވެ އަނދާ ހުލިވެފައިވަނީ ހެންވޭރުގައި ހުންނަ ގާމަގު ކެފޭ ހުންނަ އިމާރާތުގައެވެ. މި އިމާރާތުގައި އަލިފާން ރޯވީ ދެވަނަ ފަންގިފިލާގައެވެ. އެތަނަނީ ބިދޭސީންނަށް ކާންދޭ މި ކޭފެ ގެ ބަދިގެ ހުންނަ ބައެވެ.
އެންޑީއެމްއޭއިން ބުނީ އަލިފާނުގެ ހާދިސާއާ ގުޅިގެން 57 މީހަކު މަގުމަތިވެފައިވާކަށެވެ. އޭގެތެރޭގައި ހިމެނެނީ 37 ދިވެހިންނާއި 20 ބިދޭސީންކަމަށް އެންޑީއެމްއޭއިން ބުނެއެވެ. އަދި މި ހުރިހާ އެންމެނަށް ބޭނުންވާ އިންސާނީ އެހީތެރިކަން ފޯރުކޮށްދީފައިވާކަމަށްވެސް އެންޑީއެމްއޭއިން ބުނެއެވެ.
އިއްޔެ އަލިފާނުގެ ހާދިސާ ހިނގި އިމާރާތުގެ ތިންވަނަ ބައިގައި 50 ވުރެ ގިނަ ބިދޭސީން ދިރިއުޅެއެވެ. މި ތަން ހަދާފައި ހުރީ ޑެކް އަޅައިގެން ތިން ބުރިއަށެވެ. ވަށައިގެން ޖަހާފައި ހުރީ ޓިނެވެ.
މި އިމާރާތުގައި ރޯވި އަލިފާންގަނޑު ކޮންޓްރޯލްކޮށް އެއްކޮށް ނިއްވާލެވުނީ ގާތްގަޑަކަށް ގަޑިއިރެއްހާއިރު ފަހުންނެވެ. ރޯވި އަލިފާންގަނޑު ފެތުރި ޖެހިގެން ހުރި ގެއެއްވަށް ވަނީ ގެއްލުން ލިބިފައެވެ.
