މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ގެ ދަށަށް ރީޖަނަލް އެއާޕޯޓްސް އަދި އެޗްޑީސީ ދަށަށް ފަހިދިރިއުޅުން ބަދަލުކުރުމުގެ މަޝްވަރާ ކުރުމަށް ނިންމާފައިވާ ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.
ރައީސް މުޢިއްޒު މިފަދައިން ވިދާޅުވީ މިއަދު ކެބިނެޓުގެ ބައްދަލުވުމުގެ ކުރިން އާންމުކުރެއްވި ވީޑިއޯއެއްގައެވެ.
ރައީސް މުޢިއްޒު ވިދާޅުވީ ވެލާނާ އިންޓަނޭޝަނަލް އެއާޕޯޓު ހިންގާ އެމްއޭސީއެލް އާއި ރީޖަނަލް އެއާޕޯޓްސް އެއްކޮށްލައިގެން ހިންގާނެ ގޮތްތަކުގެ މަޝްވަރާތައް ކެބިނެޓުގައި މިއަދު ކުރައްވާނެ ކަމަށެވެ. އަދި އެޗްޑީސީގެ ދަށަށް ފަހި ދިރިއުޅުން ކޯޕަރޭޝަން ބަދަލުކުރުމާއި މޯލްޑިވްސް ފަންޑު މެނޭޖުމަންޓު ކޯޕަރޭޝަނާއި ބިޒްނަސް ސެންޓަ ކޯޕަރޭޝަން (ބީސީސީ) އެއްކޮށްލައިގެން ހިންގޭނެ ގޮތްތައް ހޯދުމުގެ މަޝްވަރާ ކުރުމަށް ހަމަޖެހިފައިވާ ކަމަށްވެސް ރައީސް ވިދާޅުވިއެވެ.
ތަރައްގީއަށް ވަރަށް މުހިއްމު ނިންމެވުމެއްގެ ގޮތުގައި ފާހަގަ ކުރައްވާ ރައީސް ވިދާޅުވީ އިންވެސްޓާ ރެސިޑެންސީ ޕްރޮގްރާމެއް ތައާރަފް ކުރުމަށް ހަމަޖެހިފައިވާ ކަމަށެވެ. އެއީ ކުރިއަރާފައިވާ ކުދި ބައެއް ގައުމުތަކުގައި އިގްތިސޯދު ޑައިވާސިފައިކުރުމަށް ކުރާ ކަމެއްކަމަށްވެސް ރައީސް ވިދާޅުވިއެވެ.
މީގެ ކުރިން ސަރުކާރުން ވަނީ އެސްޓީއޯގެ ސަބްސިޑަރީ ކުންފުންޏެއްގެ ގޮތުގައި ފެނަކަ ހިންގަން ނިންމައިފައެވެ.
