ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ވެރިކަމުގައި ހުންނެވިއިރު ދަތުރުފުޅު ކުރެއްވި ރިޔާސީ ލޯންޗުކޮޅު، ފިނިފެންމާގައި އެއްޗެއް ގޮއްވާލި ހާދިސާއަކީ އެމަނިކުފާނު އަމިއްލަފުޅަށް ކުޅުއްވި ”ޑްރާމާއެއް“ ތޯ ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއަރޕާސަން އަބްދުއްރަހީމް އަބްދުﷲ ރޭ ސުވާލު އުފައްދަވައިފިއެވެ.
ސަންގު ޓީވީއަށް ދެއްވި އިންޓަވިއުއެއްގައި އަބްދުއްރަހީމް ވަނީ އެ ހާދިސާއާއި ގުޅޭގޮތުން ސުވާލު އުފައްދަވާފައެވެ.
ބައެއް ފަހަރު ހީވޭ، އަޅުގަނޑަށް ދަންނަވަން ކެރިދާނެ ފިނިފެންމާ ލޯންޗު ގޮވުން މީ ޔާމީނު ކުޅުނު ޑްރާމާއެއް ނޫން ބާވާއޭ؟
– ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ
މީގެ އިތުރުން އަބްދުއްރަހީމް ވިދާޅުވީ, ޔާމީން ހައްޖަށް ވަޑައިގެންނެވުމަށްފަހު ރާއްޖެ ވަޑައިގެންނެވިތަނުން ފިނިފެންމާ ލޯންޗް ގޮއްވާލުމުގެ ހާދިސާގައި އެކަމުގައި އުސޫލުތަކާއި ހިލާފަށް އަމަލުކުރިކަމުގެ ތުހުމަތުގައި ދެ އަހަރަށް ޖަލަށްލި އޭރުގެ ކޮމާންޑަރު ކެޕްޓަން އަޙްމަދު ފަޔާޒު ޢަލީ ރިޒާ (ޕާޕާ) މެންފަދަ ބޭފުޅުން ޔާމިން އަރިހުގައި ގެންގުޅުއްވާތީ އެ ހާދިސާއާއިމެދު ސުވާލުތަކެއް އުފެދޭ ކަމަށެވެ.
އެ ދުވަހުގެ ހާދިސާއާއި ގުޅޭގޮތުން އިތުރަށް ވާހަކަ ހިއްސާކުރައްވަމުން އަބްދުއްރަހީމް ވިދާޅުވީ، ލޯންޗު ގޮއްވާލި ވަގުތު ޔާމީން ފާލަމާ ދިމާލަށް ބެއްލެވި ވަގުތު އެތަނުގައި ނޫކުލައިގެ ޓީޝާޓެއް ލައިގެން ހުރި މީހަކު ހުރިކަމަށް ރައީސް ޔާމީން ވިދާޅުވި ކަމަށެވެ. އަދި އެމަނިކުފާނަށް ވަގުތުން އެކަން ކުރީ އޭނާކަން އެނގިވަޑައިގަތްކަމަށް ވިދާޅުވި ކަމަށް ވެސް އަބްދުއްރަހީމް ވިދާޅުވިއެވެ. އަދި އެ ދުވަހު ޔާމީން އެ އިޝާރާތް ކުރެއްވީ ޕާޕާއަށް ކަމަށް ޢަބްދުއްރަހީމް ވިދާޅުވިއެވެ.
މި ހާދިސާއާއި ގުޅިގެން ޕާޕާއާއި ކުރީގެ ނައިބު ރައީސް އަހްމަދު އަދީބުގެ އިތުރުން 2 ބޮޑީގާޑަކަށް ކްރިމިނަލް ކޯޓުން ހުކުމްތަކެއް ކުރިއެވެ. ނަމަވެސް އެ މައްސަލަތައް އަލުން ބަލަން އަންގައި ހައި ކޯޓުން ވަނީ ފިނިފެންމާ ލޯންޗު ގޮއްވާލި ހާދިސާއާއި ގުޅިގެން ކްރިމިނަލް ކޯޓުން ކުރި ހުރިހާ ހުކުމެއް ބާތިލް ކޮށްފައެވެ.
