ބީއެމްއެލް މެދުވެރިކޮށް މާލީ ބަޣާވާތެއް ކުރަން މަސައްކަތްކުރިކަމަށް ތުހުމަތުކުރެވޭ މައްސަލަ ތަޙްގީގުކުރަން ފަށާފައިވާ ކަމަށް ދިވެހި ފުލުހުންގެ ޚިދުމަތުން ހާމަކޮށްފިއެވެ.
މިކަމާއި ގުޅޭގޮތުން ދިވެހި ފުލުހުންގެ ޚިދުމަތުން ނެރުނު ނޫސްބަޔާނުގައި ބުނެފައިވަނީ، ސަރުކާރުގެ މައި ހިއްސާ އޮންނަ ބޭންކަކުން ދިވެހި ރައްޔިތުންނަށް ކުއްލި ސިހުމެއް ގެނުވާފަދަ ނިންމުމެއް ނިންމި ވަގުތާއި ދިމާކޮށް ސިޔާސީ ފަރާތްތަކުން ސަރުކާރުގެ މާލީ ހާލަތާއިބެހޭ ގޮތުން ނޫސްވެރިންގެ ބައްދަލުވުމެއް ބޭއްވި ކަމަށެވެ. އަދި ހަމަ އެވަގުތު މީސް މީޑިއާގައި ބޮޓް އެކައުންޓުތައް ބޭނުންކޮށްގެން ސަރުކާރު ވައްޓާލުމަށް މަގުތަކަށް ނިކުތުމަށް ގޮވާލާ އާންމު ހަމަޖެހުން ނަގާލުމަށް ގޮވާލާފައިވާ ކަމަށެވެ. އަދި އެފަރާތްތަކުން ޤައުމުގެ މަސްލަހަތު ނަގާލުމަށް ހިތްވަރު ދީފައިވާ ކަން ހާމަވާން ހުރި ކަމަށް ފުލުހުން ނެރުނު ބަޔާނުގައި ބުނެފައިވެއެވެ.
މިކަންކަމަށް ބަލައި، މިއީ ޤާނޫނީ ސަރުކާރެއް ޢައިރު ޤާނޫނީކޮށް ބަދަލުކުރުމަށް ކުރެވިގެންދިޔަ ކަމެއްގެ ގޮތުގައި ބެލުމުގެ ޖާގަ އޮތް ކަަން ފާހަގަކޮށް ފުލުހުން ވަނީ މިމައްސަލަ ބަލަމުންދާކަން ހާމަކުރައްވާފައެވެ.
ދިވެހި ރާއްޖޭގައި އެންމެ ގިނަ ބަޔަކު ބޭނުންކުރަމުންދާ ބޭންކް އޮފް މޯލްޑިވްސްއިން އާދިއްތަ ދުވަހު މެންދުރެއްހާއިރު، ވަނީ ދިވެހި ފައިސާ ކާޑުތަކުން ބޭރުގެ އެއްވެސް މުޢަމަލާތެއް ނުކުރެވޭނެ ގޮތަށް ނިންމާފައެވެ. ސަރުކާރުން ވަނީ ބީއެމްއެލްގެ މި ނިންމެވުމަކީ ސަރުކާރުން އެކަމާއި ދެކޮޅަށް ދީފައިވާ ލަފާއާއި އެކު ނިންމާފައިވާ ނިންމުމެއް ކަމަށް ބުނެފައެވެ.
