އިދިކޮޅު އެމްޑީޕީން މި ދިޔަ އާދިއްތަ ދުވަހު ގެންނަން އުޅުނު މާލީ ބަގާވާތް ރައީސް ޑރ. މުޙައްމަދު މުޢިއްޒު ފޭލްކޮށްލައްވައިފި ކަމަށް ފިޝަރީޒް މިނިސްޓަރ އަހުމަދު ޝިޔާމް ރޭ ވިދާޅުވެއްޖެއެވެ.
ރޭ ޕީއެންސީގެ ޖަގަހަ ޖަލްސާގައި ވާހަކަ ދައްކަވަމުން މިނިސްޓަރ ޝިޔާމް ވިދާޅުވީ, ބީއެމްއެލުން ދިވެހި ރުފިޔާ އެކައުންޓްތަކުން ޑޮލަރުގެ މުއާމަލާތް ނުކުރެވޭގޮތަށް ހެދި ހެދުމަކީ އެމްޑީޕީން އަޑީގައި ތިބެ ހިންގަން އުޅުނު މާލީ ބަޣާވާތެއް ކަމަށެވެ.
އަދި ބީއެމްއެލްގެ ވެރިން ވެސް އެތިއްބެވީ އެމްޑީޕީން ހިންގަން އުޅުނު މާލީ ބަޣާވާތުގައި ބައިވެރިވެގެން ކަމަށާއި އެހެންކަމުން އެބޭފުޅުން އިސްތިއުފާދިނުމަށް ޝިޔާމް ވަނީ ގޮވާލައްވާފައެވެ. ހާއްސަކޮށް ބީއެމްއެލްގެ ސީއީއޯ މިހާރުން މިހާރަށް އިސްތިއުފާ ދިނުމަށް ޝިޔާމް ވަނީ ގޮވާލައްވާފައެވެ.
ގައުމީ ބޭންކުން (ބީއެމްއެލް) އިން ދިވެހި ރައްޔިތުންގެ ކަރުގައި ހިފަން އެ ނިންމި ނިންމުން ނިންމި އިރުގައި އެމްޑީޕީގެ ބޭފުޅުން ތިއްބެވީ ޕްރެސް ކޮންފަރެންސްގައި އެ ވާހަކަ ދައްކަން، އެއީ އިއްތިފާގެއް ނޫން. މިއީ އިންތިޒާމު ކުރެވިގެން ރޭވިގެން ހިންގަން އުޅުނު ބަގާވާތެއް
– މިނިސްޓަރ ޝިޔާމް ވިދާޅުވިއެވެ.
މިނިސްޓަރ އިތުރަށް ވިދާޅުވީ އެކަަމަކު އެ ބަގާވާތެއް ނުގެނެވުނު ސަބަބަކީ އެމްޑީޕީއަށް ރައީސް މުއިއްޒުގެ ހިކުމަތްތެރިކަން އެނގިފައި ނެތުން ކަމަށެވެ. އަދި ރައީސް އަކީ ކަންކަމާއި ކުރިމަތިލައްވަން ކެރިވަޑައިގަންނަވާ ވެރިއެއްކަންވެސް އެމްޑީޕީއަށް އެނގިފައި ނެތުން ކަމަށް ވިދާޅުވިއެވެ.
