މުޑުދާރުތަނެއްގައި ބިދޭސީތަކެއް ކާބޯތަކެތި ތައްޔާރުކޮށް ވިއްކަމުން ދިޔައީ ތެލުލިފަތާއި އަތުޖެހި އަދި ކުދިގުޅަ ކަމަށް އިމިގްރޭޝަނުން ބުނެފިއެވެ.
އިމިގްރޭޝަނުން މިގޮތަށް ހާމަކޮށްފައިވަނީ މިއަދި އެކްސްގައި ފޮޓޯތަކަކާއެކު ކުރި ޕޯސްޓެއްގައިއެވެ. އެޕޮޓޯތަކުން ފެނިގެންދަނީ ތެލުލިފަތްތާއި ކުދިގުޅަ އާއި އަތުޖެހީގެ އިތުރުން ހެލެބެލި ހުތް އަދި ފޮނި ފޯއް ތައްޔާރުކޮށްފައި ހުންނަ މަންޒަރެވެ.
އިމިގްރޭޝަނުން ބުނީ އަންގާރަ ދުވަހު އިމިގްރޭޝަން ވޮޗްއަށް ލިބިފައިވާ ރިޕޯޓަކާއި ގުޅިގެން ކުރިއަށްގެންދިޔަ ރެއިޑުގައި ގިނަ އަދަދަކަށް އާއްމުން ފިހާރަތަކުން ގަނެއުޅޭ ކާބޯތަކެތި ފެނިފައިވާކަމަށެވެ.
މިތަކެތި ތައްޔާރުކުރަމުންދިޔައީ ގަވާއިދާ ހިލާފަށް ވިޔަފާރިކުރަމުންދިޔަ ބިދޭސީންނަށްވާއިރު، މިބާވަތްތައް ތައްޔާރުކުރަމުންދިޔައީ ދިރިނޫޅެވޭވަރަށް ބާވެ ވީރާނާވެފައިވާ ގެއެއްގައިކަމަށް އިމިގްރޭޝަނުން ހާމަކުރެއެވެ.
މި މައްސަލައިގައި އިމިގްރޭޝަންގެ ބެލުމުގެ ދަށަށްވަނީ 3 ބިދޭސީން ގެންގޮސްފައެވެ.
މިކަމާއި ގުޅިގެން އިމިގްރޭޝަނުން ކުރާ މަސައްކަތްތަކަށް ގިނަ ބަޔަކު އަންނަނީ ތައުރީފުކުރަމުންނެވެ. އެހެން ނަމަވެސް ކާބޯތަކެތީގެ ވިޔަފާރި ކުރާ ތަންތަނަށް ހެލްތު ޕްރޮޓެކްޝަން އޭޖެންސީ ފަދަ ކަމާ ބެހޭ އިދާރާތަކުން ގަވާއިދުން ޒިޔާރަތްކޮށް، ސާފުތާހިރުކަން ހުރި މިންވަރު ބަލައި ދެނެނުގަންނާތީ ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ.
ރާއްޖޭގައި ގަވާއިދާ ހިލާފަށް އުޅޭ ބިދޭސީން ހޯދަން ފުލުހުންނާ ގުޅިގެން އިމިގްރޭޝަނުން އަންނަނީ ހާއްސަ އޯޕަރޭޝަނެއް ހިންގަމުންނެވެ. އެ އޮޕަރޭޝަންތަކުގައި އިމިގްރޭޝަންގެ ބެލުމުގެ ދަށަށް ގެންދާ މީހުންނަށް އިތުރު ފުރުސަތެއް ދިނުމަކާ ނުލާ ޑީޕޯޓު ކުރަމުން ދާއިރު، މިހާތަނަށް 2،000އަށް ވުރެ ގިނަ ބިދޭސިން ވަނީ ރާއްޖެއިން ފޮނުވާލައިފައެވެ.
ގަވައިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ރައްޔިތުން ގެ ފަރާތުން ލިބޭ އެއްބާރުލުން ފާހަގަކޮށް އިމިގްރޭޝަނުން ވަނީ އެފަދަ މައްސަލަތައް ’އިމިގްރޭޝަން ވޮޗު‘ އެޕް މެދުވެރިކޮށް ރިޕޯޓު ކުރަމުން ގެންދިޔުމަށް އިލްތިމާސްކޮށްފައެވެ.
