ހއ. ވަށަފަރު ޞިއްޙީ މަރުކަޒަށް އަލަށް އިތުރުކުރެވުނު އައު އިމާރާތުގެ ހުރިހާ މަސައްކަތްތަކެއް ނިމި، ބޭނުންކުރަން ތައްޔާރުވެއްޖެއެވެ.
ޞިއްޙީ ޚިދުމަތުގެ ފެންވަރު މަތިކުރުމަށް ސަރުކާރުން ކުރިއަށްގެންދިޔަ މި މަޝްރޫޢުގެ ދަށުން އިމާރާތްކުރި އައު ބައިގައި ޕަބްލިކް ހެލްތު ޔުނިޓަކާއި، އިދާރީ އޮފީސް ބަޔަކާއި، މީޓިންގ ރޫމެއްގެ އިތުރުން ބަލިމީހުންނަށް ޚިދުމަތް ދިނުމަށް ބޭނުންވާ އިތުރު ވަސީލަތްތައް ވަނީ ޤާއިމުކޮށްފައެވެ.
މި އިމާރާތުގެ މަސައްކަތް ނިމުމާއެކު، ވަށަފަރު ޞިއްޙީ މަރުކަޒަށް ކުރިމަތިވެފައިވާ ޖާގައިގެ ދަތިކަމަށް ބޮޑު ޙައްލެއް ލިބި، ރަށުގެ ރައްޔިތުންނަށް ފޯރުކޮށްދޭ ޞިއްޙީ ފަރުވާގެ ޚިދުމަތްތައް އިތުރަށް ހަރުދަނާވެގެންދާނެއެވެ.
މީގެ އިތުރުން، ކުރިއަށް އޮތް ތަނުގައި ޞިއްޙީ މަރުކަޒުން ދެމުންގެންދާ ޚިދުމަތްތައް އިތުރަށް ފުޅާކޮށް، ރަށުގައި ތިބެގެން ގިނަ ޞިއްޙީ ޚިދުމަތްތަކެއް ހޯދުމުގެ މަގު ރައްޔިތުންނަށް ތަނަވަސްވެގެންދާނެއެވެ.












