މި މައްސަލައިގައި ޝަރީއަތް ނިމެންދެން ނުވަތަ ތަހުގީގު މަރުހަލާގައި ބަންދުގައި ބެހެއްޓުމާ މެދު ގޮތެއް ނިންމުމަށް މިއަދު ކޯޓަށް ހާޒިރުކުރުމުން، ކުރީގެ ޑެޕިއުޓީ މިނިސްޓަރު ޒިހާން ހަސަންގެ ބަންދުގެ މުއްދަތު އިތުރުކުރުމަށް ކޯޓުން ވަނީ އަމުރުކޮށްފައެވެ.
ޓްރާންސްޕޯޓް މިނިސްޓްރީގެ ކުރީގެ ޑެޕިއުޓީ މިނިސްޓަރުކަމާއި އެމްއެންޑީއެފްގެ ފަސްޓް ލެފްޓިނަންޓްކަން ވެސް ކުރައްވާފައިވާ ޒިހާން ފުލުހުންގެ ބެލުމުގެ ދަށަށް ގެންގޮސްފައި ވަނީ ޏ. ފުވައްމުލަކުގައި ހުއްޓައެވެ.
އޭނާ ހައްޔަރުކުރީ ރައީސުލްޖުމްހޫރިއްޔާގެ އޮފީހާއި ރައްޔިތުންގެ މަޖިލީހުގެ އިދާރާގެ އިތުރުން ސުޕްރީމް ކޯޓު ހިންގާ އިމާރާތްތަކުގައި އަލިފާން ރޯނުކުރަނީ ކީއްވެގެންތޯ ސުވާލު އުފައްދައި ސޯޝަލް މީޑިއާގައި ހިއްސާކުރި ޕޯސްޓަކާ ގުޅިގެންނެވެ.
އެ ޕޯސްޓުގައި އެ ތަންތަނުގައި ރޯކޮށްލައިފި ނަމަ މަޖާވާނެ ކަމަށް ބުނެ އެފަދަ ނުރައްކާތެރި އަމަލެއް ހިންގުމަށް އޭނާ ހިތްވަރު ދީފައިވާއިރު، ސްޓޭޓަސް ޖެހިތާ ގަޑިއިރެއްހާއިރު ފަހުން އޭނާ ވަނީ އެ ޕޯސްޓް ސޯޝަލް މީޑިއާއިން ޑިލީޓްކޮށްލާފައެވެ.
މި މައްސަލައިގައި ޒިހާން ބަންދުގައި ހުންނަތާ މިހާރު މަހަކަށް ވުރެ ގިނަ ދުވަސް ވެފައިވާއިރު، އޭނާ ހައްޔަރުކޮށްގެން އެންމެ ފުރަތަމަ ކޯޓަށް ހާޒިރުކުރުމުން ބަންދަށް ޖަހާފައި ވަނީ 15 ދުވަހެވެ.
އެ ފަނަރަ ދުވަހުގެ މުއްދަތު ހަމަވުމުން މި މަހުގެ ފަސް ވަނަ ދުވަހު ކޯޓުން ވަނީ އޭނާގެ ބަންދަށް އިތުރު 14 ދުވަސް ދީފައެވެ.
މި މައްސަލައިގެ ތަހުގީގު އަދިވެސް ވަރަށް ބާރަށް ކުރިއަށްދާ ކަމަށާއި، ތަހުގީގަށް ބޭނުންވާ މުހިންމު ހެކިތައް ހޯދުމުގެ މަސައްކަތް ކުރަމުން އަންނަ ކަމަށް ފުލުހުން ވަނީ ބުނެފައެވެ.












