ބެޑްމިންޓަން ކުޅިވަރުން ރާއްޖެއަށް ރީތި ނަން ހޯދައިދީ، ޤައުމީ ފެންވަރުގައި ފާހަގަކޮށްލެވޭ ކާމިޔާބީތަކެއް ހާސިލުކުރުމާ ގުޅިގެން މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމު ހާސިލުކުރި ލައިބާ އަޙްމަދު މަޚްލޫފަށް ކުޅިވަރާއި ހަށިހެޔޮކަމާ ބެހޭ ވުޒާރާއިން މަރުޙަބާ ކިޔައިފިއެވެ.
ސްޕޯޓްސް މިނިސްޓްރީން ސޯޝަލް މީޑިއާގައި ހިއްސާކުރި ޕޯސްޓެއްގައި ބުނެފައިވަނީ، ބެޑްމިންޓަނުގެ ދާއިރާއިން ލައިބާ ހޯދަމުންދާ ފާހަގަކޮށްލެވޭ ފަޚުރުވެރި ކާމިޔާބީތަކުގެ އަގުވަޒަންކޮށް، ޚާއްޞަ ޚިދުމަތުގެ ޤައުމީ އިނާމު އޭނާއަށް ލިބުމަކީ މުޅި ކުޅިވަރު އާއިލާއަށް ލިބުނު ބޮޑު ޝަރަފެއް ކަމަށެވެ. އަދި މި ކާމިޔާބީއަށްޓަކައި ލައިބާއަށް އެ މިނިސްޓްރީގެ ފަރާތުން ވަނީ ހޫނު މަރުޙަބާއެއް ދަންނަވާފައެވެ.
Congratulations to Laiba Ahmed Mahloof on receiving the National Award for Special Achievement in recognition of her outstanding accomplishments in badminton.
Laiba received the award at the Republic Day ceremony for her remarkable achievement of winning gold medals in the… pic.twitter.com/BbRzL50kJX
— Ministry of Youth Empowerment, Sports and Fitness (@MoYSF_mv) November 20, 2026
މިއަހަރުގެ ޖުމްހޫރީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ލައިބާއަށް މި ޝަރަފުވެރި އިނާމު އެރުވީ، ބައިނަލްއަޤްވާމީ މައިދާނުގައި އޭނާ ހޯދި ތާރީޚީ ކާމިޔާބީތަކާ ގުޅިގެންނެވެ. އެގޮތުން، ’އާމީނިއަން ޔޫތު އޯޕަން 2025‘ ގައި ވާދަކޮށް، ސިންގަލްސް، ޑަބަލްސް އަދި މިކްސްޑް ޑަބަލްސް އިވެންޓުން ރަން މެޑަލް ހޯދައި، ލައިބާ ވަނީ މުޅި މުބާރާތުގެ މި ތިން ކެޓަގަރީންވެސް ޗެމްޕިއަންކަން ހޯދުމުގެ ޝަރަފު ހާސިލުކޮށްފައެވެ.
ޅަފަތުގައި ބެޑްމިންޓަނުގެ ދާއިރާއިން ރާއްޖެއަށް ބޮޑެތި ރީތި ނަންތަކެއް ހޯދައިދެމުން އަންނަ ލައިބާ ހޯދި މި ކާމިޔާބީއަކީ ރާއްޖޭގެ ކުޅިވަރުގެ ތާރީޚުގައިވެސް ފާހަގަކޮށްލެވޭ ފަދަ މުހިންމު ކާމިޔާބީއެކެވެ.













