ރާއްޖޭގެ ދެކުނުގެ ދެ އަތޮޅު ކަމަށްވާ ތ. އަތޮޅާއި ލ. އަތޮޅުގައި ފަތުރުވެރިކަން އިތުރަށް ފުޅާކުރުމަށްޓަކައި، ސިޓީ ހޮޓަލާއި ޓޫރިސްޓް ހޮޓާ ތަރައްގީކުރަން ޖުމްލަ ހަތަރު ބިމެއް ކުއްޔަށް ދޫކުރުމަށް ޓޫރިޒަމް މިނިސްޓްރީން ބިޑަށް ހުޅުވާލައިފި އެވެ.
މިނިސްޓްރީގެ އިއުލާނުގައިވާ ގޮތުން މި ފަހަރު ބިން ދޫކުރުމަށް ހަމަޖެހިފައިވަނީ ތ. ތިމަރަފުށިން އެއް ބިމާއި، ލ. ފޮނަދޫން ތިން ބިމެވެ.
ތިމަރަފުށިން ސިޓީ ހޮޓަލެއް ތަރައްގީކުރުމަށް ދޫކުރަނީ 26,480.67 އަކަމީޓަރުގެ ބިމެއް ކަމަށްވާއިރު، މި ބިން 50 އަހަރުގެ މުއްދަތަށް ކުއްޔަށް ނެގުމުގެ ފުރުސަތު ރާއްޖޭގެ އިންވެސްޓަރުންނަށާއި ބޭރުގެ އިންވެސްޓަރުންނަށް ވެސް ވަނީ ހުޅުވާލައިފަ އެވެ.
ތިމަރަފުށީ ބިމަށް ކުރިމަތިލާ ފަރާތްތަކުން ބިޑް ސެކިއުރިޓީގެ ގޮތުގައި ރާއްޖޭގެ ބޭންކެއްގައި 25,000 ޑޮލަރު ބަހައްޓަން ޖެހޭއިރު، ލީސް އެކްއިޒިޝަން ކޮސްޓްގެ ގޮތުގައި ދައްކަން ޖެހެނީ 100,000 ޑޮލަރެވެ.
މި މަޝްރޫއު ކާމިޔާބުކުރާ ފަރާތަކުން ދެ އަހަރު ދުވަހުގެ ތެރޭގައި އެ ބިމުގައި ހޮޓާ ތަރައްގީކޮށް އާންމުންނަށް ހިދުމަތް ދޭން ފަށަން ޖެހޭނެ ކަމަށް ޓޫރިޒަމް މިނިސްޓްރީން ބުނެ އެވެ.
ލ. ފޮނަދޫގައި ޓޫރިސްޓް ހޮޓާތައް އެޅުމަށް ދޫކުރާ ތިން ބިމުގެ ތެރޭގައި ހިމެނެނީ 32,129 އަކަފޫޓުގެ ބިމަކާއި، 33,801 އަކަފޫޓުގެ ބިމެއްގެ އިތުރުން 26,736 އަކަފޫޓުގެ ބިމެކެވެ.
މި ދެ ރަށުގެ މަޝްރޫއުތަކަށް ޝައުގުވެރިވާ ފަރާތްތަކަށް ބިޑް ޑޮކިއުމެންޓް ވިއްކުން އަންނަ އާދީއްތަ ދުވަހުން ފެށިގެން ޖެނުއަރީ މަހުގެ ހަވަނަ ދުވަހުގެ ނިޔަލަށް ކުރިއަށްދާނެ އެވެ.
ބިޑް ޑޮކިއުމެންޓް ދޫކުރާނީ ސަރުކާރު ބަންދު ނޫން ކޮންމެ ދުވަހެއްގެ ހެނދުނު 9:00 އިން މެންދުރުފަހު 1:00 އަށެވެ.
މި ބިޑްތަކާ ގުޅޭ މައުލޫމާތު ސާފުކޮށްދިނުމަށް ބާއްވާ ފުރަތަމަ ޕްރީބިޑް މީޓިން އަންނަ ޑިސެމްބަރު މަހުގެ އެއްވަނަ ދުވަހުގެ ހެނދުނު 10:00 ގައި ބާއްވާއިރު، ދެވަނަ ބައްދަލުވުން އޮންނާނީ ޑިސެމްބަރު 17 ވަނަ ދުވަހުގެ ހެނދުނު 10:00 ގައެވެ.
މި މަޝްރޫއުތަކަށް ބިޑް ހުށަހެޅުމުގެ އެންމެ ފަހު ވަގުތަކީ އަންނަ އަހަރުގެ ޖެނުއަރީ މަހުގެ ހަތްވަނަ ދުވަހުގެ ހެނދުނު 9:00 އެވެ.










