ޔަމަނުގެ ހޫޘީ ހަނގުރާމަވެރިން ދިން ހަމަލާއެއް ސައޫދީ ޢަރަބިއްޔާގެ ވެރިރަށް ރިޔާޟުގެ މާލީ މަރުކަޒުގައި ހުންނަ އުސް އިމާރާތަކަށް (ޓަވަރަކަށް) އަރައި ގެއްލުންތަކެއް ވެއްޖެއެވެ.
ސައޫދީގެ ސިވިލް ޑިފެންސް އެޖެންސީން ހާމަކޮށްފައިވާ ގޮތުގައި، މި ހަމަލާ އަރާފައިވަނީ ރިޔާޟުގެ ފައިނޭންޝަލް ސެންޓަރުގައި ހުރި ޓަވަރަކަށެވެ. މި ހާދިސާގައި އިމާރާތަށް މާއްދީ ބޮޑެތި ގެއްލުންތަކެއް ލިބުނު ނަމަވެސް، އެއްވެސް މީހަކަށް އަނިޔާއެއް ލިބިފައި ނުވާ ކަމަށް އެ އިދާރާއިން ބުނެއެވެ. މިއީ މެދުއިރުމަތީގެ މަސްރަޙު ގޯސްވަމުންދާ މިދަނޑިވަޅުގައި ސައޫދީގެ މައި ސަރަޙައްދަކަށް އަމާޒުވި ނުރައްކާތެރި ހަމަލާއެކެވެ.
މި ހަމަލާތަކާއި ގުޅިގެން އެމެރިކާގެ ރައީސް ޑޮނަލްޑް ޓްރަމްޕް މީޑިއާތަކަށް ދެއްވި ބަސްދީގަތުމެއްގައި ވިދާޅުވީ، އީރާނާ ދެކޮޅަށް ހަނގުރާމަ ކުރުމުގައި އަވަސް އަރުވާލައިގެން އެއްވެސް ނިންމުމެއް ނުނިންމަވާނެ ކަމަށެވެ. ”އަންނަ އަހަރު ފެށުމުން ވާގޮތެއް އަހަރެމެން ބަލާނީ،“ އެމެރިކާގެ މީޑިއާތަކަށް ޓްރަމްޕް ވިދާޅުވިއެވެ.
މި ދަނޑިވަޅުގައި އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) ގެ ތަރުޖަމާނު ޙުސައިން މުޙިއްބީ ވިދާޅުވީ، އެމެރިކާއިން އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާއި ހިސޯރު ކުރިއަށް ގެންދިއުމަށް އެޤައުމުން އެއްވެސް ފުރުޞަތެއް ނުދޭނެ ކަމަށެވެ.
މީގެއިތުރުން، އައި.އާރު.ޖީ.ސީގެ ނޭވީން ހާމަކުރި ގޮތުގައި ހޮރްމުޒް ކަނޑުއޮޅީގެ ދެކުނު ބިތުން ”ހުއްދަ ނޫން މަގަކުން“ ދަތުރުކުރި ދެ ސުޕަރޓޭންކަރެއްގައި ވަނީ މައިންތަކުގައި ޖެހި އަލިފާން ރޯވެފައެވެ. އެމެރިކާގެ އަސްކަރީ ޖެޓްތަކުގެ ޙިމާޔަތުގައި ދަތުރުކުރި މި ދެ ތެޔޮ ޓޭންކަރުގައި ބޮޑެތި އަލިފާންގަނޑުތަކެއް ރޯވެފައިވާ ކަމަށް އީރާނުން ބުނެއެވެ.
އަނެއްކޮޅުން، ޣައްޒާގައި އިސްރާއީލުން ޢުދުވާނު ހިންގަމުންދާތާ އަހަރަކަށްވުރެ ގިނަ ދުވަސް ފަހުން އެއްބަސްވި ”ހަނގުރާމަ ހުއްޓާލުމުގެ“ ފަހުން، އެ ސަރަޙައްދުގައި ހިންގި ފުރަތަމަ އެއްގަމު އަސްކަރީ އޮޕަރޭޝަން މިހާރު ނިންމާލާފައިވާ ކަމަށް އިސްރާއީލުގެ އަސްކަރިއްޔާއިން ވަނީ ބުނެފައެވެ. ނަމަވެސް އިސްރާއީލުން ދެމުންދާ ހަމަލާތަކުގެ ސަބަބުން ފަލަސްޠީނުގެ ރައްޔިތުންނަށް ލިބެމުންދާ ނިކަމެތިކަމާއި ގެއްލުންތަކަށް އަދިވެސް އެދެވޭ ހައްލެއް ލިބިފައެއް ނުވެއެވެ.













