އިންސާނާ މާއްދީ ގޮތުންނާއި ތަޢުލީމީ އަދި އިޤްތިޞާދީ ގޮތުން ކިތަންމެ ކުރިއެރި ނަމަވެސް، އަޚުލާޤީ ރިވެތި ސިފަތަކެއް ނެތް ނަމަ އެއީ ކުރިއަރައިފައިވާ ބައެއް ކަމަކަށް ނުބެލެވޭނެ ކަމަށް މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
”އިސްލާމް ދީނަކީ ރިވެތި އަޚުލާޤުގެ ދީން“ މި މައުޟޫޢަށް މިއަދު ރާއްޖޭގެ މިސްކިތްތަކުގައި އިއްވި ހުކުރު ޚުޠުބާގައި ބަޔާންކުރައްވާފައިވަނީ، އިސްލާމީ ބައެއް މުޖުތަމަޢުތަކުން މިއަދު ފެންނަ އަޚުލާޤީ މިންގަނޑުން ދަށް އަދި ނޭދެވޭ ސިފަތަކުގެ ސަބަބުން، އިސްލާމްދީނާ މެދު އެހެން މީހުން ޝައްކުގެ ނަޒަރަކުން ދުށުމަށް މަގުފަހިވެދާނެ ކަމަށެވެ. އެހެންކަމުން މުޢާމަލާތުކުރުމާއި ބަސްމޮށުމުގައި މަޑުމައިތިރިކަމާއި ރިވެތި އަދަބުތައް އިސްކުރުމަކީ ކޮންމެ މުސްލިމެއްގެ ވެސް ވާޖިބެއް ކަމަށް ޚުޠުބާގައި ފާހަގަކުރެއްވިއެވެ.
މީގެއިތުރުން ދިރިއުޅުމުގައި ކުރިމަތިވާ އެކި ދަތިތަކާއި އިމްތިޙާނުތަކުގައި ކެތްތެރިވުމުގެ މުހިންމުކަމުގެ މައްޗަށް ޚުޠުބާގައި އަލިއަޅުއްވައިލެއްވިއެވެ. އެގޮތުން، ދަތިޙާލެއް ނުވަތަ ބަނޑުހައިހޫނުކަމެއް ކުރިމަތިވާ ކޮންމެ ފަހަރަކު އެހެން މީހުން ބުރަ މަސައްކަތުން ހޯދާފައިވާ މުދައު ފޭރި، ވައްކަންކުރުމަކީ އިސްލާމްދީން ހުއްދަކުރާ ކަމެއް ނޫން ކަމަށާއި، މިފަދަ ހުރިހާ ޙާލަތެއްގައި ވެސް ކެތްތެރިކަން އިސްކުރަންޖެހޭނެ ކަމަށް ވިދާޅުވިއެވެ.
ރިވެތި އަޚުލާޤުން މުޖުތަމަޢު ޒީނަތްތެރިވެފައި އޮތުމަކީ ތަހުޒީބީ ގޮތުން ޤައުމެއް ކުރިއަރައިފައިވާކަމުގެ އެންމެ ފުރިހަމަ ނިޝާންކަން ފާހަގަކުރައްވައި ޚުޠުބާ ނިންމަވާލައްވާފައިވަނީ، މުސްލިމުންގެ ފަޚުރުވެރި މާޒީގައި ފައިދާހުރި ޢިލްމާއި ފަންނުތަކުގައި ކުރިއަރައިދިޔަ ފަދައިން، މިއަދު ވެސް އަޚުލާޤީ ގޮތުން ކުރިއަރައިދިއުމަށް ގަދައަޅައި މަސައްކަތްކުރުމަށް ގޮވާލައްވަމުންނެވެ.












