ދިވެހިރާއްޖޭގެ އިމިގްރޭޝަންގެ ޤާނޫނަށް ގެންނަ އިސްލާހެއް ކަމަށް ބުނެ ސޯޝަލް މީޑިއާގައި ދައުރުކުރަމުންދަނީ އެއްވެސް އަސްލެއް ނެތް ފޭކް ލިޔުމެއް ކަމަށް ހޯމް މިނިސްޓަރ ޢަލީ އިޙްސާން ވިދާޅުވެއްޖެއެވެ.
މިނިސްޓަރ އިޙްސާން މިކަން ހާމަކުރައްވައި ވިދާޅުވީ، ސޯޝަލް މީޑިއާގައި ދައުރުވަމުންދާ އެ ވާހަކަތަކަކީ އަސްލެއް ނެތް ވާހަކަތަކެއް ކަމަށާއި، އަދި އެއީ މޯލްޑިވްސް އިމިގްރޭޝަނުން އެއްވެސް އިރެއްގައި ޤާނޫނަށް އިސްލާހު ގެނައުމަށް ހުށަހެޅުމުގެ އެއްވެސް ވިސްނުމެއް ގެންގުޅެފައިވާ އިބާރާތްތަކެއް ނޫން ކަމަށެވެ.
މިނިސްޓަރ އިތުރަށް ތަފްޞީލު ދެއްވަމުން ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މިހާރު ރައްޔިތުންގެ މަޖިލީހަށް ހުށަހަޅާފައިވަނީ 50 ޞަފްޙާގެ މައްޗަށް އެކުލެވިގެންވާ އިމިގްރޭޝަންގެ މުޅިން އައު ޤާނޫނެއް ކަމަށެވެ. އަދި ސޯޝަލް މީޑިއާގައި ދެކެވޭ ވާހަކަތަކާ ޚިލާފަށް، ސަރުކާރުން ހުށަހެޅި މި އައު ޤާނޫނުގައި ”ރެސިޑެންޓް ވިސާ“ ގެ ނަމުގައި އެއްވެސް ބާވަތެއްގެ ވިސާއެއް ހިމަނާފައި ނުވާނެ ކަމުގެ ފުރިހަމަ ޔަޤީންކަން މިނިސްޓަރ ވަނީ ދެއްވާފައެވެ.
ދިވެހިރާއްޖޭގެ އިމިގްރޭޝަނަކީ ދިވެހި އެންމެހާ ރައްޔިތުންނާއި ޤައުމީ ސަލާމަތާ ސީދާ ގުޅުންހުރި ނާޒުކު އަދި ހައްސާސީ މަސައްކަތްތަކެއް ކުރަމުން އަންނަ މުހިންމު މުއައްސަސާއެއްކަން ފާހަގަކުރައްވައި، މިފަދަ އިދާރާތަކުގެ އަގު ވެއްޓޭ ގޮތަށާއި ރައްޔިތުންގެ މެދުގައި ނުތަނަވަސްކަން އުފެދޭ ގޮތަށް ދޮގު ބުހުތާނު ވާހަކަތައް ނުފެތުރުމަށް މިނިސްޓަރ އިޙްސާން ވަނީ އިލްތިމާސްކުރައްވާފައެވެ.













