ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރާއްޖެއަށް ބިޔަ އަދި ފައިދާހުރި އިންވެސްޓްމެންޓެއް ގެންނެވީތީ، އެކަން އިދިކޮޅު ފަރާތްތަކަށް ހަޖަމުނުވަނީ ކަމަށް ވިދާޅުވެ ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ޕާލިމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާޙު ފާޑުވިދާޅުވެއްޖެއެވެ.
ފަލާޙު މިހެން ވިދާޅުވެފައިވަނީ ސޯޝަލް މީޑިއާ ޕްލެޓްފޯމް އެކްސް ގައި ރޭ ކުރެއްވި ޕޯސްޓެއްގައެވެ. އެ ޕޯސްޓާއެކު އޭނާ ވަނީ އިދިކޮޅު އެމްޑީޕީގެ ޖަލްސާއެއްގައި މާލޭ ސިޓީގެ މޭޔަރު އާދަމް އާޒިމް ވާހަކަދައްކަވާ 10 ސިކުންތުގެ ވީޑިއޯ ކްލިޕެއް ވެސް ހިއްސާކުރައްވާފައެވެ.
އެ ވީޑިއޯ ކްލިޕްގައި މޭޔަރު އާޒިމް ވިދާޅުވެފައިވަނީ، ރަސްމާލެ މަޝްރޫޢާ މެދު އިދިކޮޅު ފަރާތްތަކުން ދެކޮޅު ހަދަނީ ވެރިކަމުގައި އެމްޑީޕީގެ ބޭފުޅަކު ނެތީމައި ކަމަށެވެ. އަދި ސިޔާސީ ވާދަވެރިކަމުގެ ތެރެއިން ސަރުކާރުން ހިންގާ ތަރައްޤީގެ ބޮޑެތި މަޝްރޫޢުތަކާ މެދު އިދިކޮޅު ފަރާތްތަކުން އަމަލުކުރަމުންދާ ގޮތަށް އިޝާރާތް ކުރައްވައި އާޒިމް އެ ޖަލްސާގައި ވަނީ އިތުރަށް ވާހަކަފުޅު ދައްކަވާފައެވެ.
ތިމާމެންނަށް އުޅެއުަޅެ ނުގެނެވުނު ވަރުގެ ބިޔަ ފައިދާހުރި އިންވެސްޓްމެންޓެއް ރައީސް މުޢިއްޒު ގެންނެވީތީ ހަޖަމުނުވުން ނޫން ސަބަބެއް ނެތް! pic.twitter.com/fC6SkezMBI
— Ibrahim Falah (@IbrahimFalahR) November 15, 2026
އާޒިމްގެ މި ވާހަކަތައް ހިމެނޭ ވީޑިއޯ ހިއްސާކުރައްވައި ފަލާޙުގެ ޕޯސްޓުގައި ވިދާޅުވެފައިވަނީ، އިދިކޮޅު ފަރާތްތަކުން އުޅެއުޅެ ނުގެނެވުނު ވަރުގެ ބިޔަ، ފައިދާހުރި އިންވެސްޓްމެންޓެއް ރައީސް މުޢިއްޒު ގެންނެވީތީ އެ ފަރާތްތަކަށް ހަޖަމުނުވުން ނޫން އިތުރު ސަބަބެއް ނެތް ކަމަށެވެ.
ރޭގެ ވަގުތެއްގައި ފަލާޙު ކުރެއްވި މި ޕޯސްޓަށް ގިނަ ބައެއްގެ ސަމާލުކަން ލިބިފައިވާއިރު، މިހާތަނަށް 3،800 އަށްވުރެ ގިނަ މީހުން ވަނީ އެ ޕޯސްޓް ބަލާފައެވެ. އަދި ސޯޝަލް މީޑިއާގައި ސަރުކާރަށް ތާއީދުކުރާ ފަރާތްތަކާއި އިދިކޮޅު ފަރާތްތަކުގެ މެދުގައި ރަސްމާލެ މަޝްރޫޢާއި ބޭރުގެ އިންވެސްޓްމެންޓްތަކާ ގުޅޭގޮތުން ބަހުގެ ހަމަލާތައް ދަނީ ބަދަލުކުރަމުންނެވެ.
ފުށިދިއްގަރުފަޅު ހިއްކައިގެން ތަރައްޤީކުރާ ”ރަސްމާލެ“ މަޝްރޫޢަކީ މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމަށް ރައީސް ޑރ. މުޙައްމަދު މުޢިއްޒުގެ ސަރުކާރުން ފަށާފައިވާ އެންމެ ބިޔަ މަޝްރޫޢެވެ. ސަރުކާރުން ހާމަކުރާ ގޮތުގައި މި މަޝްރޫޢު ކުރިއަށްގެންދަނީ ދައުލަތުގެ ބަޖެޓުން ޚަރަދުނުކޮށް، ބޭރުގެ އިންވެސްޓްމެންޓްގެ އެހީގައެވެ.













