ދުނިޔޭގެ ހަކުރުބަލީގެ ދުވަހާ ގުޅިގެން ރައީސުލްޖުމްހޫރިއްޔާގެ އަނބިކަނބަލުން، މެޑަމް ސާޖިދާ މުޙައްމަދު މިއަދު ސޯޝަލް މީޑިއާގައި މެސެޖެއް ހިއްސާކުރައްވައި، ހަކުރުބަލި ކުރިން ދެނެގަތުމަށާއި ބަލި ތަހައްމަލުކުރާ މީހުންނަށް އޯގާތެރިކަމާއެކު އެހީތެރިކަން ފޯރުކޮށްދިނުމަށް ގޮވާލައްވައިފިއެވެ.
މެޑަމް ސާޖިދާ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ގިނަ ބަޔަކަށް ހަކުރުބައްޔާއެކު ދިރިއުޅުމަކީ ދުވަހުން ދުވަހަށް ދިރިއުޅުމުގެ އާދަކާދަތައް ބަދަލުކުރުމާއި، ސިއްހަތަށް ފައިދާހުރި ގޮތްތައް އިޚްތިޔާރުކުރުމުގެ އިތުރުން މުޅި އުމުރަށް އެކަމަށް ފަރުވާތެރިވުން ކަމަށެވެ. އަދި ބައެއް މީހުންނަށް މި ބަލީގެ ސަބަބުން ފުރާނައަށް ނުރައްކާވާ ފަދަ ނުރައްކާތެރި އިތުރު އުނދަގޫތަކާ ކުރިމަތިލާންޖެހޭކަންވެސް އެކަމަނާ ފާހަގަކުރެއްވިއެވެ.
މީގެއިތުރުން، ދުނިޔޭގެ ހަކުރުބަލީގެ ދުވަސް ފާހަގަކުރާއިރު، ބަލި ތަހައްމަލުކުރާ ފަރާތްތަކުގެ ތަފާތު ތަޖުރިބާތައް ދެނެގަނެ، ފުރާނަ ސަލާމަތްކުރުމަށާއި ބަލީގެ ވޭން ކުޑަކުރުމަށްޓަކައި ކުރިއާލައި ފިޔަވަޅު އެޅުމުގެ މުހިންމުކަން އެކަމަނާ ވަނީ ފާހަގަކުރައްވާފައެވެ. އެގޮތުން، ފަރުވާ ހޯދަމުންދާ އާއިލާގެ މެންބަރަކަށް އެހީތެރިވުމާއި، ގަވާއިދުން ޓެސްޓުތައް ހެދުމަށް ހިތްވަރު ދިނުމާއި، އަދި އެންމެން އެކުގައި ދުޅަހެޔޮ އާދަތައް އަށަގެންނެވުމަކީ މި ބައްޔާ ދެކޮޅަށް ކުރެވޭ ވަރަށް މުހިންމު މަސައްކަތްތަކެއް ކަމަށް ވިދާޅުވިއެވެ.
For many, living with diabetes means managing daily routines, making healthier choices and staying committed to lifelong care. For others, it can mean facing serious complications, at times life threatening.
On World Diabetes Day, we recognise these different experiences and the… pic.twitter.com/XqPBrvSQw7
— First Lady Sajidha Mohamed (@sajidhaamohamed) November 14, 2026
މެޑަމް ސާޖިދާގެ ޕޯސްޓް ނިންމަވާލައްވަމުން ވަނީ، ރާއްޖެއަކީ ހަކުރުބަލި ކުރިން ދެނެގަނެވި، އަދި ބަލީގެ ހާލަތު ކޮންމެ މިންވަރެއްގައި ހުރި ނަމަވެސް، ކޮންމެ ފަރުދަކަށްވެސް އޯގާތެރިކަމާއި ފެންވަރު ރަނގަޅު ފަރުވާ ލިބޭނެ ފަދަ ޤައުމަކަށް ހެދުމަށް އެންމެން އެކުގައި މަސައްކަތްކުރުމަށް ގޮވާލައްވާފައެވެ.













