މިރޭ 09:40 އާއި 10:30 އާ ދެމެދު، މާފަންނު ޓްރެކް ސަރަޙައްދު (މޭރީ ބްރައުން ސަރަޙައްދު ބޭރު) ގައި ހަވާ އެރުވުން އޮންނާނެ ކަމަށް ފަންނާއި ސަޤާފަތާއި ތަރިކައާ ބެހޭ ވުޒާރާއިން ވިދާޅުވެއްޖެއެވެ.
އެ ވުޒާރާއިން މަޢުލޫމާތު ދެއްވާ ގޮތުގައި، މާފަންނު ޓްރެކް ސަރަޙައްދުގައި މިރޭ ބާއްވާ ޚާއްޞަ ރަސްމިއްޔާތަކަށްފަހު ކުރިއަށްދާ މި ހަވާ އެރުވުމުގެ ހަރަކާތް ދެމިގެންދާނީ 3 މިނެޓުގެ ވަގުތުކޮޅަކަށެވެ.
މި ރަސްމިއްޔާތަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިފްތިތާޙުކޮށްދެއްވާ ޤައުމީ ޚާއްޞަ ކެމްޕޭނެއް ފެށުމުގެ ގޮތުން ބާއްވާ ރަސްމިއްޔާތެކެވެ. މި ކެމްޕޭންގެ މައިގަނޑު މަޤްޞަދަކީ މުޖުތަމަޢުގެ އެކި ފަރާތްތަކުގެ މެދުގައި އޮންނަ ގުޅުން ބަދަހިކޮށް، އެކަކު އަނެކަކަށް ގަދަރުކުރުމުގެ ރީތި ސިފަ ދިވެހިންގެ ހިތްތަކުގައި އަލުން އަށަގެންނެވުމެވެ. ޚާއްޞަކޮށް ޒުވާނުންނާއި ކުޑަކުދިންގެ މެދުގައި މި އާދަ ހަރުދަނާކުރުމަކީ މި ކެމްޕޭންގެ މުހިންމު އަމާޒެކެވެ.
ދިވެހިންގެ އައިޑެންޓިޓީ ހިފެހެއްޓުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވާ ޚާއްޞަ އިސްކަމުގެ ތެރެއިން، ޤައުމިއްޔަތާއި ދިވެހި ބަހާއި ތާރީޚު ދިރާސާކޮށް ސަޤާފީ ކަންކަން އާލާކުރުމަށް ސަރުކާރުން ގެންދަވަނީ މުހިންމު މަސައްކަތްތަކެއް ކުރައްވަމުންނެވެ.











