އދ. ގެ މޫސުމަށް އަންނަ ބަދަލުތަކާ ބެހޭ 31 ވަނަ ކޮންފަރެންސް (ކޮޕް31) ކާމިޔާބުކަމާއެކު ނިންމަވާލެއްވުމަށްފަހު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު ތުރުކީވިލާތުގެ އަންޓާލިއާއިން ފުރާވަޑައިގެންފިއެވެ.
ރައީސުލްޖުމްހޫރިއްޔާގެ އޮފީހުން މިއަދު ހާމަކުރި ގޮތުގައި، މި ދަތުރުފުޅުގައި ދިވެހިރާއްޖެއިން ވަނީ މޫސުމީ ބަދަލުތަކުގެ ނޭދެވޭ އަސަރު އެންމެ ބޮޑަށް ކުރާ ޖަޒީރާ ޤައުމެއްގެ ހައިސިއްޔަތުންނާއި، އެލަޔަންސް އޮފް ސްމޯލް އައިލެންޑް ސްޓޭޓްސް (އެއޯސިސް) ގެ ހީވާގި މެންބަރެއްގެ ހައިސިއްޔަތުން ބައިނަލްއަޤްވާމީ މުޖުތަމަޢަށް ވަރަށް ސާފު މެސެޖެއް ދީފައެވެ.
މިގޮތުން ކޮޕް31 ގައި ރާއްޖެއިން އެންމެ ބޮޑަށް ވަކާލާތުކޮށްފައިވަނީ މޫސުމީ ބަދަލުތަކުން އަރައިގަތުމަށް ދޭ މާލީ އެހީތެރިކަމަކީ ދުނިޔޭގެ ޤައުމުތަކުގެ މައްޗަށް އޮތް ޒިންމާއެއް ކަމަށާއި، އެއީ ޞަދަޤާތެއް ނުވަތަ ހެޔޮފުޅުކަމުން ދޭ އެއްޗެއް ނޫން ކަމަށެވެ.
His Excellency President Dr @MMuizzu and First Lady @sajidhaamohamed depart from Antalya, Türkiye, following the successful conclusion of the 31st UN Climate Change Conference (COP31).
As a frontline island nation and active member of the Alliance of Small Island States (AOSIS),… pic.twitter.com/mAITUI3R64
— The President's Office (@presidencymv) November 12, 2026
ކުދި ޖަޒީރާ ޤައުމުތަކަށް ދެމެހެއްޓެނިވި ތަރައްޤީއާއި ވިލުންވެރިކަން ހޯދުމަށްޓަކައި، ދަރަނީގެ ބުރަ ނުއުފުލަންޖެހޭ ގޮތަށް ފަސޭހައިން ލިބޭނެ މާލީ އެހީތެރިކަން ކަށަވަރުކޮށްދިނުމަށް ދިވެހިރާއްޖެއިން އަބަދުވެސް ވަކާލާތުކުރަމުންދާނެކަމުގެ ޔަޤީންކަން ރައީސް އޮފީހުން ވަނީ ދީފައެވެ.
ތުރުކީވިލާތުގެ އަންޓާލިއާގައި ކުރިއަށްދިޔަ ކޮޕް31 ސަމިޓަކީ ދުނިޔޭގެ ޤައުމުތަކުގެ ވެރިންނާއި މޫސުމީ ބަދަލުތަކާ ގުޅޭ މާހިރުން ބައިވެރިވެ، ޖައްވު ހޫނުވުން ކޮންޓްރޯލް ކުރުމަށާއި މޫސުމީ މާލީ އެހީތެރިކަން އިތުރުކުރުމަށް މުހިންމު މަޝްވަރާތަކެއް ކުރެވުނު ބައްދަލުވުމެކެވެ.
މި ސަމިޓުގެ ތެރެއިން ރައީސް ޑރ. މުޢިއްޒު ވަނީ ތަރައްޤީވަމުން އަންނަ ކުދި ޖަޒީރާ ޤައުމުތަކަށް ކުރިމަތިވެފައިވާ ތިމާވެށީގެ ނާޒުކު މައްސަލަތަކަށް ބައިނަލްއަޤްވާމީ ފެންވަރުގައި އަވަސް ހައްލެއް ހޯދުމުގެ މުހިންމުކަމުގެ މައްޗަށް އަލިއަޅުއްވާލައްވައި ތަޤުރީރުކުރައްވައި، އެކި ޤައުމުތަކުގެ އިސްވެރިންނާ ބައްދަލުކުރައްވާފައެވެ.












