މާތް ﷲ އިންސާނުންނަށް މިންވަރުކުރައްވާފައިވާ ގުނާ އަދަދު ނުކުރެވޭހާ ގިނަގުނަ ނިޢުމަތްތަކަށް ޝުކުރުވެރިވުމަކީ މުސްލިމެއްގެ ކިބައިގައި ހުންނަންޖެހޭ އަދި އީމާންކަން ފުރިހަމަކޮށްދޭ އެންމެ މުހިންމު އެއް ސިފަ ކަމަށް މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
”ނިޢުމަތްތަކަށް ޝުކުރުވެރިވުމުގެ މުހިންމުކަން“ މި މަޢުޟޫޢަށް ރާއްޖޭގެ މިސްކިތްތަކުގައި މިއަދު އިއްވި ޚުޠުބާގައި ފާހަގަކުރެއްވި ގޮތުގައި، ﷲ ގެ ނިޢުމަތްތަކަށް އިޢުތިރާފުވެ، އެ ނިޢުމަތްތައް އެކަލާނގެ ރުހިވޮޑިގަންނަވާ މަގުގައި ބޭނުންކުރުމަކީ މާތްވެގެންވާ އަޅުކަމެކެވެ. އަދި ޝުކުރުވެރިވުމަކީ މާތް ﷲ ގެ ލޯތްބާއި ރުހިވޮޑިގަތުން ލިބި، ދުނިޔެއާއި އާޚިރަތުގައިވެސް ހެޔޮކަން އިތުރުވެގެންދާނެ ސަބަބެއް ކަމަށް ބަޔާންކުރެއްވިއެވެ.
މީގެ އިތުރުން، މާތް ﷲ ގެ ނިޢުމަތްތަކަށް ޝުކުރުވެރިވުމުގެ އިތުރުން މައިންބަފައިންނަށާއި، ހެޔޮކަންކަން ކޮށްދޭ މީސްތަކުންނަށް ޝުކުރު އަދާކުރުމަކީވެސް އިސްލާމީ މަތިވެރި އަޚްލާޤުގެ ތެރެއިން ވާޖިބުވެގެންވާ ކަމެއް ކަމަށް ޚުޠުބާގައި ހަނދާންކޮށްދެއްވިއެވެ. މީސްތަކުން ކޮށްދޭ ކަންކަމުގެ އަގުވަޒަންކޮށް ޝުކުރު އަދާނުކުރާ މީހަކު، މާތް ﷲ އަށް ޝުކުރުވެރި ނުވާނެކަމަށް އައިސްފައިވާ ޙަދީޘްފުޅުތަކަށްވެސް ޚުޠުބާގައި އަލިއަޅުއްވާލެއްވިއެވެ.
ޚުޠުބާ ނިންމަވާލައްވަމުން ވިދާޅުވީ، ދެއްވި ނިޢުމަތްތަކަށް ޝުކުރުވެރިވާ އަޅުންނަށް އެކަލާނގެ ނިޢުމަތްތައް އިތުރުކޮށްދެއްވާނެ ކަމަށާއި، ނަމަވެސް ނިޢުމަތްތަކަށް ކާފިރުވެ ޝުކުރުވެރި ނުވާ މީހުންނަށް ގަދަފަދަވެގެންވާ ޢަޛާބު ހުރިކަމަށް ކީރިތި ޤުރްއާނުގައި ވަޙީކުރައްވާފައިވާ ކަމަށެވެ. އެހެންކަމުން ދެއްވި އެންމެހައި ނިޢުމަތްތަކަށް އަބަދުވެސް ޝުކުރުވެރިވާ ބައެއްގެ ގޮތުގައި ދެމިތިބުމަށް މިއަދުގެ ޚުޠުބާގައި ވަނީ ނަސޭހަތްތެރިވެފައެވެ.













