އާއިލާތަކުގެ ދުޅަހެޔޮކަމާއި އާންމު ސިއްހަތާ ގުޅޭގޮތުން ހޭލުންތެރިކަން އުފެއްދުމުގެ މަގުސަދުގައި ކުރިއަށްގެންދިޔަ ”ހެލްތް އެންޑް ފެމެލީ އެކްސްޕޯ“ ގިނަ ބައެއްގެ ތަރުހީބާއެކު ނިންމާލައިފިއެވެ.
މި ހިނގާ މަހުގެ 5 އިން 7 އަށް ކުރިއަށްދިޔަ މި ހަރަކާތަކީ، ގިނަ އަދަދެއްގެ އާންމު ރައްޔިތުން ޒިޔާރަތްކޮށް، ސިއްހީ ދާއިރާއާ ގުޅުންހުރި މުހިންމު އެތައް މައުލޫމާތުތަކެއް އެއް ފުރާޅެއްގެ ދަށުން ހޯދުމަށް މަގުފަހިވެގެންދިޔަ ހަރަކާތެކެވެ. މާލެ ސަރަހައްދުގެ ހޮސްޕިޓަލްތަކާއި ކްލިނިކްތަކުގެ އިތުރުން، އަތޮޅުތަކުގެ ރީޖަނަލް ހޮސްޕިޓަލްތަކާއި މަދަނީ ޖަމިއްޔާތައް ހިމެނޭހެން 60 އަށް ވުރެ ގިނަ ސްޓޯލް މި އެކްސްޕޯގައި ވަނީ ބައިވެރިވެފައެވެ.
މި އެކްސްޕޯގެ ޒަރީއާއިން ސިއްހީ ކުއްލި ހާލަތްތަކުގައި ގުޅަންޖެހޭ އެހީގެ ނަންބަރުތަކުގެ މައުލޫމާތު ފަސޭހައިން ލިބިގެންދިޔައިރު، ސިއްހީ އަދި އިޖުތިމާއީ ހިދުމަތްދޭ އެކި އިދާރާތަކުން ލިބެންހުރި ހިދުމަތްތަކާއި އެ ހިދުމަތްތައް ހޯދާނެ ގޮތްތަކުގެ އިރުޝާދު ވެސް ޒިޔާރަތްކުރި ފަރާތްތަކަށް ވަނީ އޮޅުންފިލުވައިދީފައެވެ.
ހުރިހާ އުމުރުފުރާއަކަށް ހާއްސަކޮށްގެން ބޭއްވި މި އެކްސްޕޯގައި މައުލޫމާތު ދިނުމުގެ ސެޝަންތަކުގެ އިތުރުން ކުޑަކުދިންނަށް ތަފާތު ތަޖުރިބާތައް ކޮށްލުމުގެ ފުރުސަތު ވެސް ވަނީ ފަހިކޮށްދީފައެވެ. އެގޮތުން އެމްބިއުލާންސް ބަލައިލުމާއި މައިކްރޮސްކޯޕް ބޭނުންކުރުން ފަދަ ޢަމަލީ ތަޖުރިބާތަކުގެ އިތުރުން، ދުޅަހެޔޮކޮށް ހުރުމަށް ރަނގަޅު ކާނާ ކެއުމާއި ފެން ބުއިމުގެ މުހިންމުކަން ކުދިންނަށް ވަނީ ދަސްވެގެން ގޮސްފައެވެ.
މި ހަރަކާތަށް އާންމުންގެ ފަރާތުން ލިބުނު ފުރިހަމަ ތަރުހީބަށް ބަލައި، ސިއްހަތާ ބެހޭ ވުޒާރާއިން ހާމަކޮށްފައިވަނީ އަންނަ އަހަރު މިއަށްވުރެ ފުޅާ ދާއިރާއެއްގައި އަދި އިތުރު ސްޓޯލްތަކާއެކު މި އެކްސްޕޯ ބޭއްވުމަށް އަމާޒު ހިފާފައިވާ ކަމަށެވެ.










