ސަޢޫދީ އަރަބިއްޔާއާއި ޕާކިސްތާނާއެކު ވެވިފައިވާ ”މައްކާ ޖޮއިންޓް ޑިފެންސް އެގްރީމަންޓް“ ތުރުކީގެ ބަރުލަމާނުން ރަސްމީކޮށް ތަޞްދީޤުކޮށްފިއެވެ.
ބުރާސްފަތި ދުވަހު ތުރުކީގެ ޤާނޫނުހަދާ މަޖިލީހުގައި ނެގުނު ވޯޓުގައި، މި އެއްބަސްވުން ފާސްވެފައިވަނީ 279 ވޯޓުންނެވެ. އެއްބަސްވުމާ ދެކޮޅަށް 119 މެންބަރުން ވޯޓުދިން އިރު، ވޯޓުގައި ޖުމްލަ 398 މެންބަރުން ބައިވެރިވިއެވެ. މިއީ އޮގަސްޓް 7 ގައި މައްކާގައި ތުރުކީގެ ރައީސް ރަޖަބް ޠައްޔިބު އަރްދޮޣާން، ސަޢޫދީ ވަލީޢަހުދު މުޙައްމަދު ބިން ސަލްމާން އަދި ޕާކިސްތާނުގެ ބޮޑުވަޒީރު ޝަހްބާޒް ޝަރީފް ސޮއިކުރި އެއްބަސްވުމެކެވެ.
އެއްބަސްވުމުގައި ބައިވެރިވާ ޤައުމެއްގެ އިސްތިޤްލާލަށާއި ސަރަޙައްދީ ނަޒާހަތްތެރިކަމަށް ކުރިމަތިވާ ނުރައްކާތައް ނައްތާލުމަށް ”ބޭނުންވިކޮންމެ ވަޞީލަތެއް“ ބޭނުންކުރުމަށް އިޤްރާރުވެއެވެ.
އެއް ޤައުމަކަށް ދެވޭ އަސްކަރީ ޙަމަލާއަކީ ތިން ޤައުމަށްމެ ދެވޭ ޙަމަލާއެއްގެ ގޮތުގައި ބަލައި، ހަމަލާރައްދުވާ ޤައުމަކަށް އެހެން ޤައުމުތަކުން ވަގުތުން އަސްކަރީ އަދި އެހެނިހެން އެހީތެރިކަން ފޯރުކޮށްދޭންޖެހޭނެއެވެ.
ޔަމަންގެ ޙޫޘީން ސަޢޫދީ ޢަރަބިއްޔާއަށް ދެމުންދާ ޙަމަލާތަކާ ގުޅިގެން، ތުރުކީގެ ސިފައިންނާއި ދިފާޢީ ވަސީލަތްތައް ސަޢޫދީއަށް ފޮނުވުމުގެ ޤާނޫނީ ހުއްދަ ތުރުކީ ސަރުކާރަށް މިހާރު ވަނީ ލިބިފައެވެ. މިއީ ސަޢޫދީގެ މާލީ ބާރާއި، ޕާކިސްތާނުގެ ނިއުކްލިއަރ/އަސްކަރީ ބާރާއި، ތުރުކީގެ ނޭޓޯ ފެންވަރުގެ ޓެކްނޮލޮޖީއާއި ދިފާޢީ އުފެއްދުންތެރިކަން އެއްކޮށްލި ވަރުގަދަ ސަރަޙައްދީ އިއްތިހާދެކެވެ.













