ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ހައްޔަރުކޮށްފައިވާ ކުރީގެ ފޮރިން މިނިސްޓަރު އަބްދުﷲ ޝާހިދުގެ މައްސަލައިގެ މައުލޫމާތު، ދިވެހި ސަރުކާރުން ބޭރުގެ ގައުމުތަކުގެ ފޮރިން މިނިސްޓްރީތަކަށާއި އެމްބަސީތަކަށް ރަސްމީކޮށް ހިއްސާކޮށްފިއެވެ.
ޚާރިޖީ ވުޒާރާއިން ފޮނުވި ”އިންފޮމޭޝަން ނޯޓު“ގައިވާ ގޮތުން، ޝާހިދު ހައްޔަރުކޮށްފައި ވަނީ 18 އަހަރުން ދަށުގެ ކުޑަކުއްޖަކާ މެދު ޖިންސީ ކުށެއް ހިންގި ކަމުގެ ތުހުމަތުގައި ކޯޓު އަމުރެއްގެ ދަށުންނެވެ. އަދި އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 30 ދުވަހުގެ މުއްދަތެއް ދީފައިވާކަން ވެސް އެ ނޯޓުގައި ފާހަގަކޮށްފައިވެއެވެ.
މި މައްސަލައިގެ އިތުރު ތަފުސީލެއް ފުލުހުން އަދި އާންމުކޮށްފައި ނުވި ނަމަވެސް، ޖިނާއީ ތަޙުޤީޤު ކުރިއަށްދާ ކަމަށް ފޮރިން މިނިސްޓްރީގެ ނޯޓުގައި ބުނެފައިވެއެވެ.
އެ ނޯޓުގައި އިތުރަށް ބުނެފައި ވަނީ، ތަޙުޤީޤުގެ މަރުޙަލާއާއި ޝަރުޢީ އިޖުރާއާތުތަކުގެ ތެރެއިން ޤާނޫނީ ވަކީލެއްގެ އެހީތެރިކަން ހޯދުމާއި ޢަދުލުވެރި ޝަރީޢަތެއް ލިބުމުގެ ޙައްޤު ހިމެނޭހެން، ޤާނޫނުއަސާސީން ލިބިދޭ އެންމެހައި ޙައްޤުތައް ޝާހިދަށް ކަށަވަރުކޮށްދެވޭނެ ކަމަށެވެ.
މީގެއިތުރުން، ރާއްޖޭގައި ކުޑަކުދިންނަށް ކުރާ ޖިންސީ ގޯނާތައް ހުއްޓުވުމަށާއި، އަނިޔާލިބޭ ކުދިންގެ ޙައްޤުތަކާއި މަޞްލަޙަތު ރައްކާތެރިކުރުމަށް ހަރުދަނާ ޤާނޫނީ އޮނިގަނޑެއް އޮތްކަން ފާހަގަކޮށް، މައްސަލައިގައި ޝާމިލުވާ ކުއްޖާގެ ރައްކާތެރިކަމާއި ޒާތީ މަޢުލޫމާތު ރައްކާތެރިކުރުމަށް ކަމާބެހޭ އިދާރާތަކުން އިސްކަންދޭނެ ކަމަށްވެސް ފޮރިން މިނިސްޓްރީން ބުނެފައިވެއެވެ.
