ރަސްމާލެއިން 500 ހެކްޓަރުގެ ބިން ދުބާއީގެ އީގަލް ހިލްސް ކުންފުންޏަށް ދިނުމުގެ މަޝްރޫއަށް ކުރީގެ ރައީސް މުހައްމަދު ނަޝީދު ތާއީދު ކުރައްވައި ވާހަކަފުޅު ދެއްކެވި ނަމަވެސް، އެމަނިކުފާނުގެ ވިސްނުމާ ދެކޮޅަށް އެމްޑީޕީގެ ގައުމީ މަޖިލީހުން ”ނޫނެކޭ“ ބުނެ، އެ މަޝްރޫއާ ދެކޮޅަށް ރައްޔިތުންގެ ފެންނަ ނުފެންނަ ވޯޓެއް ނެގުމަށާއި މަގުމައްޗަށް ނުކުމެ ސިލްސިލާ މުޒާހަރާތަކެއް ކުރުމަށް ބޮޑު އަޣުލަބިއްޔަތަކުން ފާސްކޮށްފިއެވެ.
އެމްޑީޕީގެ ގައުމީ މަޖިލީހުގެ ޖަލްސާއަށް ކޮލަމާފުށީ ދާއިރާގެ ރައީސް މަހުފޫޒު ސައީދު ހުށަހެޅުއްވި މި ގަރާރަށް ކެންދޫ ދާއިރާގެ މަޖިލިސް މެންބަރު މައުރޫފް ޒާކިރު ތާއީދު ކުރެއްވިއިރު، މި ގަރާރު ފާސްވީ ބައްދަލުވުމުގައި ބައިވެރިވެވަޑައިގެންނެވި 58 މެންބަރުންގެ ތެރެއިން 57 މެންބަރުންގެ ސަރީހަ ވޯޓުންނެވެ. މި ގަރާރާ ދެކޮޅަށް ވޯޓު ދެއްވީ އެންމެ މެންބަރެކެވެ.
ޖަލްސާގެ ރިޔާސަތުގައި ހުންނަވައިގެން ރައީސް ނަޝީދު ވަނީ ރަސްމާލެ މަޝްރޫއަށް ތާއީދުކުރައްވާކަން ހާމަކުރައްވައި، ބައެއް މެންބަރުން ދެއްކެވި ވާހަކަތަކަކީ ސާބިތު ނުހިފޭ ވާހަކަތަކެއް ކަމަށް ވިދާޅުވެ އެ ވާހަކަތައް ހުއްޓުވަން މަސައްކަތް ކުރައްވާފައެވެ. ނަމަވެސް، ޖަލްސާގައި ވާހަކަދެއްކެވި އެހެން މެންބަރުން ވަނީ އެމަނިކުފާނުގެ ވިސްނުމާ ދެކޮޅަށް، އެ މަޝްރޫއާ ދެކޮޅަށް ވަކާލާތު ކުރައްވާފައެވެ.
ގަރާރަށް ބަހުސް ކުރައްވަމުން އެމްޑީޕީގެ ޗެއާޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވީ، ރަސްމާލެ މަޝްރޫއާ ގުޅޭގޮތުން ރައްޔިތުންގެ ފެންނަ ނުފެންނަ ވޯޓެއް ނެގުމަށް ސަރުކާރުން އިޖާބަ ނުދީފިނަމަ، މި މަހުގެ 17 ވަނަ دުވަހުން ފެށިގެން ރާއްޖޭގެ އެކި ކަންކޮޅުތަކުން މީހުން މާލެއަށް އެއްވެ، ސިލްސިލާ މުޒާހަރާތަކުން މަގުތައް ފުރާލަންޖެހޭ ކަމަށެވެ. އަދި މި އިހުތިޖާޖުތައް އިންތިޒާމުކުރުމަށް ހާއްސަ ކޮމިޓީއެއްވެސް ވަނީ އެކުލަވާލާފައެވެ.
ކުރީގެ ފޮރިން މިނިސްޓަރު އަބްދުﷲ ޝާހިދު ވިދާޅުވި ގޮތުގައި ފުށިދިއްގަރުފަޅުގެ މުޅި މަޝްރޫއަކީ އޮޅުވާލުމެއްގެ ތެރެއިން ހިންގާ ކަމެކެވެ. ބަޖެޓުގައި ނެތް ހަރަދުތަކެއް އޮޅުވާލައިގެން ކުރަމުން ގޮސް، ރައްޔިތުންގެ ފައިސާއިން 800 މިލިއަން ޑޮލަރާ ހަމައަށް އެ ތަނަށް ހަރަދުކޮށްފައިވާ ކަމަށް އޭނާ ތުހުމަތު ކުރެއްވިއެވެ.
ކުރީގެ ފިނޭންސް މިނިސްޓަރު އިބްރާހީމް އަމީރު ވިދާޅުވީ، ރައްޔިތުންގެ ޓެކްސް ފައިސާއިން ހިއްކާފައިވާ ބިމެއް އެކުއިޒިޝަން ކޮސްޓެއް ނުލިބޭ ގޮތަށް ބޭރުގެ ކުންފުންޏަކަށް ދިނުމަކީ ބަލައިގަނެވޭނެ ކަމެއް ނޫން ކަމަށެވެ. އަދި އެ މަޝްރޫއުން ގައުމަށް ފައިދާވާނެ ކަމަށް ސަރުކާރުން ބުނާ ބުނުމަކީ ހަގީގަތާ ހިލާފު ވާހަކައެއް ކަމަށްވެސް އޭނާ ވިދާޅުވިއެވެ.













