މި އަހަރު ފާހަގަކުރާ މަސްވެރިންގެ ދުވަހުގެ މުނާސަބަތުގައި ދިނުމަށް ހަމަޖެހިފައިވާ ހާއްސަ އެވޯޑުތަކަށް ނަން ހުށަހެޅުމުގެ ފުރުސަތު މަސްވެރިކަމާ ބެހޭ ވުޒާރާއިން އިތުރުކޮށްފިއެވެ.
މަސްވެރިކަމާ ބެހޭ ވުޒާރާއިން މިއަދު އާންމުކުރި އިއުލާނެއްގައި ވިދާޅުވީ، މި އެވޯޑުތަކަށް އެދި ހުށަހެޅުމުގެ ސުންގަޑި އަންނަ ހޮނިހިރު ދުވަހުގެ މެންދުރުފަހު 12:00 އާ ހަމައަށް މިހާރު އިތުރުކުރެވިފައިވާ ކަމަށެވެ. މި އެވޯޑުތަކަށް ކުރިމަތިލުމުގެ ފުރުސަތު އެންމެ ފުރަތަމަ ހުޅުވާލީ މިދިޔަ އޮކްޓޫބަރު މަހުގެ 7 ވަނަ ދުވަހުއެވެ. އަދި ކުރިން އޮތްގޮތުން އެ މުއްދަތު ހަމަވީ އިއްޔެގެ ނިޔަލަށެވެ.
މި އަހަރުގެ އެވޯޑު ދިނުމަށް ކަނޑައަޅާފައިވަނީ މައިގަނޑު ހަތަރު ދާއިރާއަކުންނެވެ. އޭގެ ތެރޭގައި އެހެން އަހަރުތަކާ ހިލާފަށް ފާހަގަކޮށްލެވޭ މުހިންމު ބަދަލެއްގެ ގޮތުން، މިފަހަރު ވަނީ އަންހެން ކެޔޮޅުންނާއި މަސްވެރިންނަށް ވެސް ހާއްސަ ފުރުސަތެއް ތަނަވަސްކޮށްދީފައެވެ.
މިގޮތުން އެވޯޑަށް ކުރިމަތިލެވޭ ދާއިރާތަކަކީ:
- އެންމެ ހިދުމަތްތެރި ޒުވާން ކެޔޮޅު (35 އަހަރުން ދަށް):މަސްވެރިކަމުގައި އަމަލީގޮތުން މިހާރުވެސް ހަރަކާތްތެރިވާ، އަދި އާމްދަނީ ހޯދުމަށް މަސްވެރިކަން ފިޔަވައި އެހެން މަސައްކަތެއް ނުކުރާ ފަރާތްތަކަށް.
- އެންމެ ތަޖުރިބާކާރު ކެޔޮޅު (35 އަހަރުން މަތި): މިހާރު ވެސް އަމަލީ ގޮތުން ދާއިރާގައި މަސައްކަތްކުރާ، އަދި މަސްވެރިކަން ފިޔަވައި އެހެން މަސައްކަތެއް އާމްދަނީ ހޯދަން ނުކުރާ ފަރާތްތަކަށް.
- ހިދުމަތްތެރި ފަރުމަސްވެރިޔާ: އާމްދަނީ ހޯދުމުގެ މައިގަނޑު ވަސީލަތެއްގެ ގޮތުގައި ފަރުމަހުގެ މަސްވެރިކަން ކުރާ ފަރާތްތަކަށް.
- ހިދުމަތްތެރި އަންހެން މަސްވެރިޔާ: މަސްވެރިކަމުގެ ދާއިރާގައި އަމަލީގޮތުން ހަރަކާތްތެރިވެ، އާމްދަނީ ހޯދުމަށް އެ މަސައްކަތްކުރާ އަންހެނުންނަށް.
މި އެވޯޑުތަކަށް އެދި އަމިއްލަ ހައިސިއްޔަތުން ނަން ހުށަހެޅުމުގެ އިތުރުން، އެހެން ފަރާތްތަކުން ވެސް ޝަރުތުހަމަވާ ފަރާތްތަކުގެ ނަން ހުށަހެޅުމުގެ ފުރުސަތު ވަނީ ހުޅުވާލެވިފައެވެ. އެވޯޑަށް އެދި ހުށަހަޅާ ފޯމުތައް ވުޒާރާގެ ރަސްމީ ވެބްސައިޓުން ޑައުންލޯޑް ކުރެވެން ހުންނާނެ ކަމަށާއި، ފުރިހަމަކޮށްފައިވާ ފޯމުތައް fisheriesmanagement@fishagriocean.gov.mv އަށް އީމެއިލް ކުރުމަށް މިނިސްޓްރީން އެދެއެވެ.
ދިވެހިރާއްޖޭގައި ކޮންމެ އަހަރަކުވެސް މަސްވެރިންގެ ދުވަސް ކުލަގަދަކޮށް ފާހަގަކުރަމުން އަންނަނީ ޑިސެމްބަރު މަހުގެ 10 ވަނަ ދުވަހުއެވެ.
