އިދިކޮޅު އެމްޑީޕީން ޒަމާނުއްސުރެ ވަކާލާތު ކުރަމުން އައި އާންމު އިޖުތިމާއީ ހަމަތަކާއި ޑިމޮކްރެޓިކް އިސްލާހީ އަސާސްތައް ދޫކޮށް، ބޭރު މީހުންނާ ތަފާތުކުރުމާއި ހައްދުފަހަނައަޅާފައިވާ ގައުމިއްޔަތުގެ ނާމާން ޝިއާރުތައް އިސްކުރަމުންދާތީ އެ ޕާޓީގެ ޗެއާޕާސަން މުހައްމަދު ނަޝީދު ބޮޑެތި ކަންބޮޑުވުންތަކެއް ފާޅުކުރައްވައިފިއެވެ.
މުހައްމަދު ނަޝީދު މިކަންބޮޑުވުން ފާޅުކުރެއްވީ ރަސްމާލެ މަޝްރޫއުގެ ދަށުން ޔޫއޭއީގެ އީގަލް ހިލްސް ކުންފުންޏަށް 550 ހެކްޓަރުގެ ބިން ދޭން އުޅޭ މައްސަލައިގައި، އެ ކުންފުންޏާއި އިޒްރޭލާ ގުޅުން އޮތް ކަމަށް ބުނެ އެމްޑީޕީގެ ގައުމީ މަޖިލީހުން ވަކި ސްޓޭންޑެއް ނެގުމަށް ބައްދަލުވުމެއް ބާއްވަން ތައްޔާރުވެފައި ވަނިކޮށެވެ.
އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވީ، އެމްޑީޕީގެ މިހާރުގެ މިސްރާބަކީ ޕާޓީގެ ސިޔާސީ ހައިސިއްޔަތު ބައްޓަންކޮށް، އެންމެ ފުރަތަމަ ސަޕޯޓަރުންނަށް އުންމީދުތައް ގެނެސްދިން އަސާސީ އުސޫލުތަކާ މުޅިން ހިލާފު މިސްރާބެއް ކަމަށެވެ. އަދި އާންމުންގެ ޖަޒުބާތުތަކާއި ބިރުވެރިކަން އުފައްދައިގެން ކުރު މުއްދަތުގެ ސިޔާސީ ފައިދާ ހޯދަން އުޅުމަކީ، ތާރީހީ ގޮތުން ޕާޓީއަށް ތާއީދުކުރި ތަހުޒީބީ އަދި ހުޅުވާލެވިފައިވާ ފިކުރުގެ މައިގަނޑު ސަޕޯޓަރުންގެ ތާއީދު ގެއްލިގެންދާނެ ކަމެއް ކަމަށްވެސް އެނާ ފާހަގަކުރެއްވިއެވެ.
އެމްޑީޕީގެ ކެމްޕޭންތަކުގައި ކުރިން ބޭނުންކުރި ”ބިރަކާ ނުލާ މަޖާކުރުން“ ފަދަ ޝިއާރުތަކުގެ ސަބަބުން އިތުރު 20،000 ވޯޓު ޕާޓީއަށް އިތުރުވެ މަގުބޫލުކަން ފުޅާވިކަން ހަނދާންކޮށްދެއްވަމުން ނަޝީދު ވިދާޅުވީ، ސިޔާސީ ހަތިޔާރެއްގެ ގޮތުގައި ދީން ބޭނުންކުރުމާއި ”ޒަޔަނިސްޓުން ގައުމު ހިފަނީ“ ފަދަ އަސާސެއް ނެތް ވާހަކަތައް ފެތުރުމަކީ ޕާޓީގެ އިތުބާރު ބޮޑުކުރެވޭނެ ކަމެއް ނޫން ކަމަށެވެ.
އީގަލް ހިލްސްގެ ޗެއާމަން މުހައްމަދު އަލް-އައްބާރަށް ފުރައްސާރަކުރުމަކީ ބޭރުގެ އިންވެސްޓްމަންޓްތަކަށް ހުރަސްއެޅޭނެ ކަމެއް ކަމަށް ވިދާޅުވެ، ޔޫއޭއީއަކީ އެމްޑީޕީއާ ގާތް ގައުމެއްކަމުން އެ މަޝްރޫއާ ދެކޮޅަށް އެމްޑީޕީން ނުނުކުތުމަށް ނަޝީދު ވަނީ އެ ޕާޓީގެ ގައުމީ މަޖިލީހުގެ ވަޓްސްއެޕް ގްރޫޕުގައިވެސް އެދިވަޑައިގެންފައެވެ.
އިދިކޮޅު ފަރާތްތަކުން ދައްކާ ވާހަކަތަކަށް ރައްދު ދެއްވަމުން މުހައްމަދު މުއިއްޒާއި އިންފްރާސްޓްރަކްޗާ މިނިސްޓަރު އަބްދުﷲ މުއްތޮލިބު ވަނީ، ރަސްމާލޭން އިޒްރޭލުގެ އެއްވެސް މީހަކަށް ނުވަތަ އިޒްރޭލުގެ ބާރު ހިނގާ ކުންފުންޏަކަށް އިންވެސްޓް ކުރުމުގެ ނުވަތަ ޕްރޮޕަޓީ ގަތުމުގެ ފުރުސަތެއް ގާނޫނީ ގޮތުން ނޯންނާނެ ކަމަށް ވިދާޅުވެފައެވެ.
