އަންނަ އަހަރުގެ ޖެނުއަރީ ފުރަތަމަ ދުވަހުން ފެށިގެން މަހަކު 60،000 ރުފިޔާއަށްވުރެ ބޮޑު އާމްދަނީއެއް ލިބޭ މީހުން އަމިއްލަ ސިއްހީ މަރުކަޒުތަކުން އާސަންދަ މެދުވެރިކޮށް ހިދުމަތް ހޯދާއިރު 15 އިންސައްތައިގެ ކޯ-ޕޭމަންޓެއް ނަގަން ސަރުކާރުން ނިންމައިފިއެވެ.
ސިއްހަތާ ބެހޭ ވުޒާރާއިން އާންމުކުރި އުސޫލުގައިވާ ގޮތުން މި ފީ ނަގާނީ އާސަންދަ ސްކީމުގައި ރަޖިސްޓަރީވެފައިވާ އަމިއްލަ ކްލިނިކްތަކާއި، ހޮސްޕިޓަލްތަކާއި، ފާމަސީތަކުގެ އިތުރުން އޮޕްޓިކަލް އަދި ޕްރޮސްތެޓިކް ހިދުމަތް ދޭ ތަންތަނުންނެވެ. ނަމަވެސް ސަރުކާރުގެ ސިއްހީ މަރުކަޒުތަކާއި ހޮސްޕިޓަލްތަކުން ހިދުމަތް ހޯދާ ފަރާތްތަކުގެ އަތުން މިފަދަ އެއްވެސް ފީއެއް ނުނަގާނެއެވެ.
މީގެއިތުރުން ސަރުކާރުގެ ފެސިލިޓީތައް މެދުވެރިކޮށް ރާއްޖެއިން ބޭރަށް އިތުރު ފަރުވާއަށް ފޮނުވަންޖެހޭ ހާލަތްތަކުގައި ވެސް، މިހާރުވެސް އަމަލުކުރަމުންދާ އުސޫލުގެ ދަށުން އެއްވެސް ކޯ-ޕޭމަންޓެއް ނެގުމަކާ ނުލައި ފުރިހަމައަށް އާސަންދައިގެ ހިދުމަތް ލިބޭނެއެވެ.
މަތީ އާމްދަނީ ލިބޭ ފަރާތްތަކުގެ ތެރެއިން ގައުމަށް ބޭނުންތެރި ފަންނީ ދާއިރާތަކުގެ މީހުން ހިފެހެއްޓުމުގެ ގޮތުން ބައެއް ދާއިރާތަކުގެ މުވައްޒަފުން ވަނީ މި އުސޫލުން އިސްތިސްނާކޮށްފައެވެ. އެގޮތުން އިސްތިސްނާވަނީ ޑޮކްޓަރުންނާއި މެޑިކަލް ދާއިރާގެ ފަންނީ މުވައްޒަފުންނާއި، ޕައިލެޓުންނާއި އޭވިއޭޝަން ދާއިރާގެ މުވައްޒަފުންގެ އިތުރުން އިންޖިނިއަރުންނާއި ސައިންސް ބޭސްޑް ދާއިރާތަކުގެ ފަންނީ މުވައްޒަފުންނެވެ.
ދައުލަތުގެ ސިއްހީ އިންޝުއަރަންސް ނިޒާމު ހަރުދަނާކޮށް އިސްރާފު ކުޑަކުރުމަށް ރައީސް މުޙައްމަދު މުޢިއްޒު ނިންމެވި މި ނިންމެވުމުގެ ސަބަބުން ދައުލަތުގެ ބަޖެޓުން އަހަރަކު ގާތްގަނޑަކަށް 287 މިލިއަން ރުފިޔާ ސަލާމަތްކުރެވޭނެއެވެ. އަދި ސަލާމަތްކުރެވޭ ފައިސާ ހޭދަކުރާނީ ރައްޔިތުންނަށް އެންމެ ބޭނުންތެރި އަސާސީ ކަންކަމަށާއި އިޖުތިމާއީ ތަރައްގީއަށް ކަމަށް ސަރުކާރުން ބުނެއެވެ.
