ސަޢޫދީ ޢަރަބިއްޔާގެ ތެޔޮ ސާފުކުރާ މައި ކާރުޚާނާތަކަށާއި، ބައިނަލްއަޤްވާމީ އެއާޕޯޓުތަކުގެ އިތުރުން އަސްކަރީ މަރުކަޒަކަށް އަމާޒުކޮށް 6 ޙަމަލާއެއް ދީފައިވާ ކަމަށް ޔަމަނުގެ ހޫޘީ ޖަމާޢަތުން ދަޢުވާކޮށްފިއެވެ.
ހޫޘީންގެ އަސްކަރީ ތަރުޖަމާނު ޔަޙްޔާ ސަރީޢު ބުނި ގޮތުގައި، މި ހަމަލާތައް އަމާޒުކޮށްފައިވަނީ އިރުމަތީ ޕްރޮވިންސްގައިވާ ރައުސް ތަނޫރާ އަދި އަބްޤައިޤް ގައިވާ އަރާމްކޯގެ ފެސިލިޓީތަކަށާއި، ރަތްކަނޑުގެ އައްސޭރިފަށުގައިވާ ރާބިޣް ތެޔޮ ރިފައިނަރީއަށެވެ. މީގެ އިތުރުން ރިޔާޟުގެ ކިންގް ޚާލިދު އިންޓަރނޭޝަނަލް އެއާޕޯޓަށާއި، ދައްމާމުގެ ކިންގް ފަހުދު އިންޓަރނޭޝަނަލް އެއާޕޯޓަށް އަދި ނަޖްރާންގައިވާ ސަޢޫދީގެ އަސްކަރީ ކޮމާންޑް ސެންޓަރަށް ޙަމަލާ ދީފައިވާނެކަމަށް ޔަހްޔާ ސަރީއު ދަޢުވާކޮށްފައިވެއެވެ.
ސަޢޫދީ ޢަރަބިއްޔާއިން މި ފެސިލިޓީތަކަށް ސީދާ ހަމަލާއެއް އެރިކަން ކަށަވަރުކޮށްދީފައެއް ނުވެއެވެ. ނަމަވެސް ސަޢޫދީ ކޯލިޝަނުން ވަނީ ރިޔާޟަށް އަމާޒުކޮށް ހޫޘީން ފޮނުވާލި ދެ ބެލިސްޓިކް މިސައިލަކާއި، އިރުމަތީ ޕްރޮވިންސްއަށް ފޮނުވާލި މިސައިލެއްގެ އިތުރުން މައްކާ ސަރަޙައްދަށް އަމާޒުކުރި ޑްރޯނެއް ވައިގެ ތެރޭގައި ވައްޓާލިކަމަަށް ބުނެފައެވެ. ރިޔާޟަށް ވެއްޓުނު މިސައިލް އެތިކޮޅުތަކުގެ ސަބަބުން އާންމުންގެ މީހަކަށް އަނިޔާވެ، ގެއަކަށް ވަނީ ގެއްލުން ލިބިފައެވެ.
