ރަސްމާލޭގައި ޔޫއޭއީގެ އީގަލް ހިލްސް ކުންފުނިން ބޮޑު މަޝްރޫއެއް ހިންގުމަށް ތައްޔާރުވަމުންދާ ދަނޑިވަޅެއްގައި، ދިވެހި މުޖުތަމައުގެ އިސްލާމީ އަދި ގައުމީ އުސޫލުތައް ހިމާޔަތްކުރުމަށް ގޮވާލައި ބަޔާނެއް ނެރުމާ ގުޅިގެން ޖަމިއްޔަތުއް ސަލަފުގެ އިލްމުވެރިންނަށް މީސްމީޑިއާގައި މަރުގެ އިންޒާރުދީ އަބުރަށް އަރައިގަންނަން ފަށައިފިއެވެ.
އިސްލާމްދީނަށް މީހުން ހޭލުންތެރިކުރުވުމުގައި ހަރަކާތްތެރިވާ އެ ޖަމިއްޔާގެ އިލްމުވެރިންނާ ދެކޮޅަށް ސޯޝަލް މީޑިއާގައި ބައެއް މީހުން ދަނީ އިންތިހާއަށް ހުތުރު ބަސްތައް ބޭނުންކޮށް، ޖިސްމާނީ އަނިޔާދިނުމަށާއި ރަށްރަށުން ފަހާލުމަށް ވެސް ގޮވާލަމުންނެވެ.
މި ނުރައްކާތެރި އިންޒާރުތަކާއި ފުރައްސާރަތައް ކުރިމަތިވާން ފެށީ ރަސްމާލޭގެ ”މޯލްޑިވްސް ވޯޓާފްރޮންޓް އެންޑް މެރީނާ“ މަޝްރޫއު އެކަށައެޅުމުގައި އިސްލާމީ ޝަހުސިއްޔަތާއި ގައުމީ ސިޔާދަތު ހިމާޔަތްކުރުން ހިމެނޭހެން އަށް ކަމަކަށް ރިއާޔަތްކުރުމަށް ސަލަފުން އިލްތިމާސްކުރުމާ ގުޅިގެންނެވެ. އެ ބަޔާނާ ގުޅިގެން ސޯޝަލް މީޑިއާގައި ޚިޔާލުފާޅުކުރި ބައެއް މީހުން ވަނީ އިލްމުވެރިންގެ ތުނބުޅިތަކުގައި ރޯކޮށްލުމަށާއި، އެބޭފުޅުންގެ އިތުބާރު ގެއްލުވާލުމުގެ ގޮތުން ރިޝްވަތު ނަގާކަމުގެ ތުހުމަތުތައް ވެސް އަޅުވާފައެވެ.
މި މަޝްރޫއާ ގުޅިގެން އިދިކޮޅު ބައެއް ފަރާތްތަކުން އެ ތަނުގައި ޔަހޫދީން ވަޒަންވެރިކުރުވަފާނެ ކަމުގެ ކަންބޮޑުވުން ފާޅުކުރި ނަމަވެސް، ރައީސް ޑރ. މުހައްމަދު މުއިއްޒު ވަނީ އެކަން މުޅިން ދޮގުކުރައްވާފައެވެ. ސަރުކާރުން ކަށަވަރުކޮށްދީފައިވާ ގޮތުގައި އެ ތަނުގައި ދިރިއުޅޭނީ މުޅިންވެސް ދިވެހިންނާއި މުސްލިމުން ކަމަށާއި، އިސްރާއީލުގެ ރައްޔިތުންނަށް އެތަނުން ތަނެއް ގަތުން ނުވަތަ ހޯދުން ގާނޫނީގޮތުން މަނާވާނެއެވެ.
ޔޫއޭއީގެ އީގަލް ހިލްސް ކުންފުންޏާއެކު ވެވޭ އެއްބަސްވުން ރައްޔިތުންގެ މަޖިލީހަށް ހުށަހެޅުމަށް ހަމަޖެހިފައިވާއިރު، ރަސްމާލޭގައި ތަރައްގީކުރާ ތަންތަން ދޫކުރެވޭނީ 99 އަހަރުގެ މުއްދަތަށެވެ. އެ މުއްދަތު ހަމަވުމުން އެ ތަންތަން އަނބުރައި ދިވެހި ދައުލަތަށް ވިއްކާލަންޖެހޭ ގޮތަށް އުސޫލުތައް ބައްޓަންކުރެވިފައިވާ ކަމަށް ސަރުކާރުން ވަނީ ހާމަކޮށްފައެވެ.
99 އަހަރަށް ފަހު ދިވެހި ދައުލަތަށް ވިއްކުން ބަލައިނުގަންނަން. އެއްވެސް އަގަކާއި ނުލައި ދިވެހި ދައުލަތަށް ހަވާލުކުރަން ޖެހޭނެ.