ބަންގްލަދޭޝްގެ ކުރީގެ ބޮޑުވަޒީރު ޝައިޚް ޙަސީނާ ވެރިކަން ވެއްޓުމުން އަސްކަރީ ހެލިކޮޕްޓަރެއްގައި ޤައުމު ދޫކުރައްވައި ފިއްލެވި މަންޒަރު ފެންނަ ވީޑިއޯ ސޯޝަލް މީޑިއާއަށް ދޫކޮށްލި ކަމަށް ބެލެވޭ އެ ގައުމުގެ އެއާފޯސްގެ ކުރީގެ އޮފިސަރު، ނުބައި ގޮތަކަށް މަރުވެފައި އޮއްވާ ފެނިއްޖެއެވެ.
ގެއްލިގެން ހޯދަމުން ދަނިކޮށް މަރުވެފައި އޮއްވާ ފެނިފައިވަނީ އުމުރުން 28 އަހަރުގެ ކޭ.އެމް ތަޙްސީފް ސޫރީއެވެ. އޭނާގެ ހަށިގަނޑު ފެނިފައިވަނީ މި މަހުގެ 28 ވަނަ ދުވަހުގެ ހަވީރުގެ ވަގުތެއްގައި، ވެރިރަށް ޑާކާގެ އުއްތަރުޚާން ސަރަޙައްދުގައި އޮންނަ ތުރާގް ކޯރުގެ ތެރެއިންނެވެ. ފުލުހުން ބުނި ގޮތުގައި އޭނާއަކީ ކާކުކަން ދެނެގަނެވުނީ ޖީބުގައި އޮތް އައިފޯނާއި އަތުގައި އަޅާފައި އޮތް ގަޑީގެ އެހީގައެވެ.
ތަޙްސީފްގެ އާއިލާއިން ހާމަކުރި ގޮތުގައި، އޭނާ ގެއްލުނީ މަންމައާއެކު ބާޒާރުކުރަން ގޮސް އުޅުމަށްފަހު، ރަޙުމަތްތެރިއަކު ގުޅައިގެން ބޭރަށް ދިޔަ ފަހުންނެވެ. ދަންވަރު 1:35 ހާއިރު ގެއަށް އަންނަ ކަމަށް ބުނެ މެސެޖު ކުރުމަށްފަހު އޭގެ ފަހުން އޭނާގެ އެއްވެސް ޚަބަރެއް ނުވެއެވެ. އޭނާގެ ބައްޕަ އެނާޔަތުލް ކަރީމް ބުނެފައިވަނީ، ދަރިފުޅު މަރުވެފައި އޮއްވާ ފެނުނު ސަރަޙައްދަށް އޭނާ ދާންޖެހޭ އެއްވެސް މަގުބޫލު ސަބަބެއް ނޯންނާނެ ކަމަށެވެ.
މި ހާދިސާއާ ގުޅިގެން ތަޙްސީފްގެ އާއިލާއިން ތުހުމަތުކުރާ ގޮތުގައި އޭނާ މަރާލާފައިވަނީ ޙަސީނާ ފިއްލެވި ވީޑިއޯ އާންމުކުރުމާ ގުޅިގެންނެވެ. އެ ވީޑިއޯގެ ސަބަބުން އޭނާގެ ވަޒީފާ ގެއްލި، އެކި ގޮތްގޮތުން ބިރުދެއްކުމާއި ފުރައްސާރައާ ކުރިމަތިލާންޖެހުނު ކަމަށްވެސް އާއިލާއިން ބުނެއެވެ. މީގެ އިތުރުން އިންޑިއާގެ ޖާސޫސީ އިދާރާ (ރޯ) އަށް މަސައްކަތްކުރާ މީހެއް ކަމަށް ބުނެ ނޫހަކުން ފެތުރި ޚަބަރަކާ ގުޅިގެން، އޭނާގެ ޕާސްޕޯޓް ހިފަހައްޓައި ވަޒީފާއިން ވަނީ ވަކިކޮށްފައެވެ.
މި މައްސަލައިގެ ތަޙުޤީޤު ފުލުހުން އަދި ނިންމާފައި ނުވާއިރު، އޭނާގެ ހަށިގަނޑު މިހާރު ވަނީ ޕޯސްޓްމޯޓަމް ހެދުމަށްޓަކައި ޝަހީދު ސުހްރަވަރްދީ މެޑިކަލް ކޮލެޖް ހޮސްޕިޓަލަށް ގެންގޮސްފައެވެ. މަރުވުމުގެ މަދު މަސްތަކެއް ކުރިން ޕޮޑްކާސްޓެއްގައި ވާހަކަދައްކަމުން ގައުމަށްޓަކައި ގުރުބާންވުމަކީ ފަޚުރެއް ކަމަށް ބުނެފައިވާ ތަޙްސީފްގެ މަރާއެކު، ބަންގްލަދޭޝްގައި އާންމުންގެ ރައްކާތެރިކަމާމެދު އަނެއްކާވެސް ވަނީ ބޮޑެތި ކަންބޮޑުވުންތަކެއް އުފެދިފައެވެ.
