ޣައްޒާގެ ހުޅަނގު އައްސޭރިފަށުގެ އަތިރިމަތީގައި ޖަހާފައިވާ ވަގުތީ ކޭމްޕްތަކުގައި ދިރިއުޅޭ ފަލަސްޠީނުގެ އެތައް ހާސް އާއިލާތަކަކުން، އެކަށީގެންވާ ބޯހިޔާވަހިކަމެއް ނެތި ވާރެޔާއި ވަޔާއި ފެންބޮޑުވުމުގެ 4 ވަނަ ފިނި މޫސުމާ ކުރިމަތިލާން ތައްޔާރުވަމުންދެއެވެ.
ޣައްޒާ ސިޓީގެ ހުޅަނގު އަތިރިމަތީ ކޭމްޕެއްގައި ދިރިއުޅޭ އުމުރުން 60 އަހަރުގެ މުޙައްމަދު އަލް-ޖަމާލްއާއި އޭނާގެ ފިރިހެން ދަރިން ދަނީ ކަނޑުން އަންނަ ވަޔާއި ވާރޭއިން ރައްކާތެރިވުމަށްޓަކައި، އެމީހުންގެ ބާވެފައިވާ ޓެންޓުގެ ނައިލޯން ތާރުޕާލުތައް ބިމުގައި ހިފެހެއްޓޭތޯ މަސައްކަތްކުރަމުންނެވެ. މިއީ ގެދޮރުން ނެރެލާފައިވާ ފަލަސްޠީނު ރައްޔިތުން އެކަށީގެންވާ ހިޔާވަހިކަމެއް ނެތި ފިނި މޫސުމަކާ ކުރިމަތިލާ 4 ވަނަ އަހަރެވެ.
ފިނިމޫސުމުގައި ފިނިހޫނުމިން 7 ޑިގްރީ ސެލްސިއަސް (45 ޑިގްރީ ފަރަންހައިޓް) އަށް ވެއްޓިގެންދާއިރު، ކަނޑުން އަންނަ ގަދަ ވަޔާއި ވާރޭގެ ސަބަބުން އިޙްސާސްކުރެވޭ ފިނިކަން މިއަށްވުރެ މާ ބޮޑެވެ. ”އަޅުގަނޑުމެން ދަނީ ފެނާއި ވަޔާއި ދެކޮޅަށް ރައްކާތެރިވުމަށް ވެވުނު މިންވަރަކުން ތައްޔާރުވަމުން. ނަމަވެސް ވިލާގަނޑާއި ތޫފާން އައުމުން ޓެންޓުތައް ވީދައިގެންގޮސް، އަނެއްކާވެސް ޖެހެނީ އަލުން ފަށަން. މިއީ މުޅި ފިނިމޫސުމުގައި ކުރިމަތިވާ ނިމުމެއްނެތް ތަކްލީފެއް،“ އަލް-ޖަމާލް ބުންޏެވެ.
އަނިޔާވެރި އިސްތިއުމާރީ ޒަޔަނިސްޓު ވެރިކަމުން ޣައްޒާއަށް އެހީގެ ތަކެތި އެތެރެކުރުން ހިފަހައްޓާފައިވާތީ، ފިނިމޫސުމަށް ބޭނުންވާ ވަރުގަދަ ޓެންޓުތަކާއި ހީޓަރުތައް އަދި ތަރުފާލު އެތެރެކުރެވޭގޮތެއް ނުވެއެވެ. މީގެ ސަބަބުން ޣައްޒާގެ އެތައް މިލިއަން ރައްޔިތުން އަނެއްކާވެސް ވާރޭގެ ފެންބޮޑުވުމާއި، ގަދަ ފިނީގެ ނުރައްކަލަށް ވަނީ ހުށައެޅިފައެވެ.
